白花油王子顏福偉出道21年，自資發行7張唱片，樂壇豬肉獎輪不到他，在無綫電視廣告頒獎禮上僅屬「掹車邊」的唱歌獎也落空，氣得他大罵無綫兼要抽廣告。拿手搞飯局的無綫總經理陳志雲左一句「成屋白花油」，右一句「嬲完未呀」成功破冰，兩人迅速交換電話做朋友，顏福偉更笑言最想八卦飯局陳的私生活！ 撰文：吳佩思
顏福偉於本月9日在葵青劇院舉行「有福同享顏福偉愛多80年講唱會」，只演一場，收益悉數捐給無國界醫生。近千張門票開售不足一星期便售罄，張學友還自掏腰包捐錢，顏福偉說：「如果賣晒飛嘅話都會有10幾萬，收到學友張支票之後，我成個心都定晒！」另有一事他特別提醒一眾「福迷」︰「唔好帶bombom棒入場，我唔想製造咁多垃圾！」
不要沉迷娛樂圈
所謂講唱會，即顏福偉獻唱之餘，還邀請多位來自商界的CEO好友，大談人生之道，包括百事可樂副總裁施振康、佐丹奴主席及行政總裁劉國權、奧美集團主席袁文俊及無綫總經理陳志雲等。
至於為何萌起「有福同享」念頭，顏福偉就說：「娛樂圈有起有跌，我都知𠵱家係食住個勢，所以更加要提醒自己熱潮減退嗰陣唔好唔開心，最緊要係享受過程，我想同大家有福同享，分享呢個道理。」
入行21年，今年初嘗做風頭躉滋味，演出多個校園騷大受學生歡迎，難怪當事人自言不懂應付：「我嘅經理人、同我合作嘅人都覺得我一唔滿意就會發脾氣，為咗呢個講唱會，我同其中一個合作單位有少少磨擦，呢排成日失眠，我首新歌《快樂不快樂》就係提醒自己，唔好自我膨脹，唔好showoff、唔好沉迷娛樂圈。」
大方受靶冇對罵
顏福偉早前失落無綫《最受歡迎廣告頒獎典禮》一事，幸而如今他與陳志雲的關係已雨過天晴，顏福偉還邀請對方任講唱會嘉賓，他說：「我send電郵問佢想唔想傾吓，佢好快打番畀我問：『點呀，嬲完未呀？』我同佢真係不打不相識，之前大家嘅關係只係hello拜拜嗰種，上次我批評小圈子選舉，佢受晒靶，但都好大方，冇同我對罵，仲話自己成屋白花油，我覺得佢係用另一種方法同我道歉，佢喺處理呢件事上面真係無懈可擊。」
關注對方私生活
問顏福偉覺得陳志雲能否做知心好友？他說：「唔知喎，我啱啱先攞咗佢個電話，不過聽人講佢係由AO做到呢個位，我覺得佢好叻。」又笑道：「我同其他人一樣，都想八吓佢嘅私生活，我已經攞咗佢個電話！」談到有指陳志雲屆時會表演唱歌跳舞，顏福偉說：「佢唔制呀，話之前只係講笑。」
攝影：陳慧安
寧捐10萬唔益無綫
無綫與亞視打仗，顏福偉也置身漩渦中，早前舉行《勁歌優秀選》，起初曾要求顏福偉預留檔期出席，結果顏福偉婉拒了擔任亞視《金紫荊獎頒獎典禮》嘉賓，但後來無綫卻反口說不用他出席。最近無綫又打他主意，提出安排攝製隊拍攝他的講唱會，但要顏福偉付10萬元，節目會安排在無綫收費台播出。
顏福偉笑道﹕「我寧願將10萬蚊捐晒畀無國界醫生啦！你唔畀獎我唔緊要，唔好hold住我個期嘛！我都同無綫講咗，今年台慶如果冇獨立airtime畀我，就唔使預我喇，我唔係新人，冇理由仲要成班人一齊唱？我係做生意，offer條件啱咪做囉，最多咪唔做！」
