如果要車路士「油王」班主阿巴莫域治玩《百萬富翁》，你估佢會點答以上𠵱條問題？俗語話「衰開有條路」，車路士前晚喺英超睇住曼聯、阿仙奴同利物浦齊齊贏1:0，但自己就打和富咸0:0，兼且要有隊長泰利撞爆臉同射手杜奧巴攞紅牌，足智彩冠軍賠率仲冷到8倍；唔知班主阿巴莫域治有冇後悔當日炒咗摩連奴呢？
車仔炒咗摩連奴後搵咗格蘭嚟教，但格蘭好唔得球員歡心，聽講班球員仲密謀喺聖誕前篤走佢。話時話，格蘭接手後，班波冇轉好之餘反而仲差咗，上場聯賽作客曼聯喺打少一個下輸0:2，前晚迎戰弱隊富咸亦只係打和0:0，聯賽連續4場冇贏過兼冇入波，家陣跌落第8位，少1、2位嘅阿仙奴同曼聯7分及5分，比排第4嘅利記亦少3分，所以佢哋冠軍賠率亦越嚟越冷，由開季嘅2.15倍大熱變成𠵱家嘅8倍第4熱，簡直令人難以置信。
泰利又傷杜奧巴被逐
咁都未夠衰，車仔中堅泰利喺對富咸場波撞爆臉，聽講佢至少都要唞兩個星期，周中場歐聯唔駛預佢，甚至連英格蘭嚟緊兩場歐國外都應該打唔到；另外，啱啱先傷癒復出嘅前鋒杜奧巴，唔知係咪餓波太耐，踢得鬼咁狼，結果兩黃一紅離場；而雪上加霜嘅係，摩連奴嘅心腹、喺隊內德高望重嘅副領隊奇勒，盛傳因為格蘭信佢唔過，短期內會離開車仔。
車仔話晒係英超四強之一，對上3季聯賽亦攞咗2冠1亞，𠵱家搞成咁令人惋惜之餘，仲會係球迷嘅損失。我求大俠仲收到風，話車仔球迷認為隊波處於谷底，罪魁禍首係「油王」班主阿巴莫域治同CEO簡安，所以賽後好唔畀面，猛咁唱摩連奴個名，有部份更激到走去簡安面前爆粗同吐口水。睇嚟「油王」唔搵番個同摩連奴咁上下級數嘅領隊嚟教，隨時收唔到科。