李安執導嘅電影《色，戒》喺香港上映以嚟，截至前日5日共收1,139萬，票房同口碑都好好，喺台灣就7日共收約9,600萬新台幣（約2,290萬港元），單係台北就收咗4,700萬新台幣（約1,121萬港元），至於齣戲上星期五喺美國紐約戲院單廳上映，收咗61,700美元（約48萬港元），李安都應該飲得杯落咯。
馮仁昭早幾日去睇呢齣戲時，發現呢部三級片有好多女性觀眾捧場，到散場時仲聽到幾個女仔圍埋研究，討論梁朝偉同湯唯喺第二幕正面進入嘅床上戲係咪打真軍？好多觀眾都懷疑假戲真做。
觀眾期待出DVD
其實李安之前嚟香港，馮仁昭都向李安打聽過，佢就話唔係打真軍，至於偉仔私下都俾朋友問起呢件事，佢都話唔係，純粹係導演就鏡頭嚟拍，雖然話拍呢啲場面有清場，但點都會有幾個工作人員喺現場睇住，加上有咁多大光燈照住，根本兩個演員係一啲feel都冇，但觀眾睇到嘅畫面就可以有好多想像空間，有啲女觀眾仲話睇唔清偉仔嘅蛋蛋，等DVD出時要買嚟定格睇番清楚，睇嚟呢部戲嘅DVD一定好銷情。
