無論是《金枝慾孽》中的如妃，還是《師奶兵團》中的蒙嘉嘉，鄧萃雯均演得手到拿來，偏偏她卻被《歲月風雲》中的汪紹芬一角難倒。為配合劇情所需，雯女經常要悉心打扮，結果穿高踭鞋行路行到腰痠背痛，記連戲服及配飾記到一頭煙，加上經常駁髮染髮極難打理，令雯女拍攝初期十分𤷪𤺧，更揚言今次是拍劇以來最大的考驗。
鄧萃雯在《歲月風雲》中飾演富家千金出身的汪紹芬，嫁給苗僑偉飾演的華文碩後，也一直過着無憂無慮的少奶奶生活，直至二人離婚，她才開始努力工作，開拓充實的美好人生。雖然角色發揮上對雯女可謂沒有難度，但她卻形容今次是從演多年以來最辛苦的一趟。
雯女說：「今次部劇我成日要扮到彩雀咁，場場戲着3、4吋高踭鞋，行路行到我腰痠背痛，每次開工要帶一大堆飾物同手袋配襯，又要連戲，淨係事前影低每套衫襯邊個手袋、邊對鞋，同邊啲首飾呢啲連戲相，已經影咗幾本，真係好煩。」
染髮甩色尷尬
原來拍攝《歲》劇初期，雯女更因受髮型問題困擾十分𤷪𤺧，她說：「每次set頭set幾個鐘，又要駁髮又要染髮，隔幾個月頭髮長咗，又要拆咗重新駁過，拍呢部劇7個月以來，我未好好洗過一次頭，因為怕抓得太大力，啲駁髮會斷。不過最慘都係染髮，我個頭要染紫紅色，染完之後係咁甩色，屋企啲枕頭袋同毛巾都變晒紅色。
「去到內地拍外景住酒店，執房啲人見到我用過嘅毛巾枕頭袋變晒紅色，唔單止尷尬，仲好唔環保，因為啲白毛巾染咗色之後洗唔甩，酒店啲人會掉咗去，所以我要同執房啲人講唔好掉，留番畀我替換，反正我啲頭髮會再甩色。仲有就係，我最怕拍落雨戲，我堅持一定要擔遮，如果唔係就會血流披面好恐怖。」
儘管造型上問題多多，雯女仍為有機會跟一班好戲之人合作感到開心，對一些佔戲不多但有實力的演員尤為讚賞，如飾演其弟汪紹良的陳國邦便是其中之一。
大讚弟弟出色
雯女說：「我覺得阿邦同飾演我爸爸嘅劉江叔好正，佢哋好有家人感覺，我曾經同阿邦講過：『有付出努力就會有人睇到。』一部劇裏面唔係個個都係一線，做演員要一直唔灰心，真係好唔容易，我見到有好多演員好用心，但佢哋唔係主角，所以自己可以做嘅，就係畀多啲鼓勵同支持佢哋，今日你畀多啲支持人哋，他日人哋好嘅時候，又會畀多啲支持自己。」
採訪：戴彩煥
攝影：陳志嵐
髮型：MichaelLamofHairCulture
服裝：PauleKa
場地：奧海城
搶先睇：永標接任爆衝突
第56集劇情講述華文翰（劉松仁飾）為了女兒華清瑜（宣萱飾），以及家人可以和諧共處，決定放棄主席一職。危永標（馬德鐘飾）正式出任華喆主席，新官上任，永標要求車廠大革新，改變生產路線，銳意開拓高檔次汽車市場，於是永標將車廠所有資源投放在研發高檔次汽車。華振邦（林峯飾）安排到中東開拓新市場，返港後得悉永標出任華喆主席，異常憤怒。永標借故開除吳志明（蔡子健飾），振邦知道後，非常激動，在酒樓巧遇永標，二人發生衝突。
