陳曉東以「強心之星」身份，聯同官恩娜、周麗淇、方力申同吳雨霏等人，噚日喺跑馬地馬場出席「世界心臟日」嘉年華會，歌手着住大會提供嘅T恤，作為強心之星嘅陳曉東更加着住西裝唱主題曲，大熱天時包到實應該都流晒汗。
今次個個歌手都好乖冇乜點改衫，只係周麗淇同裕美剪成露膞裝。平時走開性感路線嘅官恩娜，衫都冇改仲着住貼身牛仔長褲，馮仁昭笑佢係咪驚啲人心臟負荷唔到佢太性感先至咁密實，佢話：「邊度有呢個能力喎！呢個係老少咸宜嘅活動，上年我出席呢個活動要跳繩，咁今次着褲穩陣啲。」
否認有離心
之前有傳官恩娜聯同佢前經理人過檔周麗淇、關心妍所屬嘅BMA唱片公司，官恩娜話：「我冇話過走，會飲水思源留番喺公司。」更否認怕跟周麗淇等人爭一姐先至放棄。至於周麗淇就搵咗個新嘅經理人，佢話：「我覺得佢都有好多構思，幫我搵到好多未合作過嘅監製做歌，我覺得𠵱家都幾明朗。」
另外，有傳新城台長朱明銳「歸位」後，公司員工分兩派，朱明銳更炒咗唔聽話嘅快必，啱啱喺美國返嚟嘅薛家燕就話：「應該唔會啩！我同邊一個合作都開心，大家應該都係為公司好。」
