中港融合一早已經蔓延到股市，香港散戶要了解大陸股市行情，大陸散戶想知港股搞邊科，首先就要知人哋嘅術語。《中港股典》網羅內地股市術語，逐個解釋，將之同港股術語作比較，助你縱橫中港股市。
A股市場早喺1990年已經成立。至於A股，係由中國境內企業發行，用人民幣認購同交易嘅普通股股票，只供境內機構、組織或個人投資者購買。
B股就係中國企業發行嘅人民幣特種股票，喺內地股票交易所上市，以外幣進行交易。B股市場喺92年成立，開始時僅限外國投資者買賣（即係境外同埋港澳台投資者），但01年2月19日以後，B股市場亦開放畀內地投資者。
ST股，英文叫SpecialTreatment，即係垃圾股，係指嗰啲上市公司，連續兩年都虧損，或者每股資產淨值低過股票面值，呢類股票，交易時需要特別處理，包括股票每日升跌限制為5%，股票名稱須加上「ST」，中期報告亦必須經過審核。