全城潮玩facebook，《福佳始終有你》嘅fansclub成員亦利用呢個媒介，組織惡搞葉劉行動。Halloween月尾至到，佢哋就應吓節，喺組群搞個「12月2日港島鬼屋探秘」活動，仲將葉劉同撐佢嘅許冠文、盛智文個頭，key落嘩鬼個身度，口號係「奉海洋公園主席盛智文呼籲，全港市民用腳趕鬼！」寓意要踢走葉劉。
《福佳》又有新作
網絡世界絕對係今次補選嘅一大戰場。除咗facebook成為串連熱點外，YouTube亦勢將成為兩邊陣營支持者發放文宣嘅主要渠道。早排將政府宣傳歌《始終有你》改編成《福佳始終有你》而熱爆嘅創作人林忌，聽講亦已經密鑼緊鼓炮製緊新作，預計不日出街，唔知係咪叫《陳太始終有你》呢？
另外，有網民驚香港人太過善忘，唔記得咗03年反23條嘅集體回憶，所以特別喺YouTube度，將《葉劉淑儀──亂嗡23條》呢首Rap歌翻炒。首歌將葉太當年推23條嘅金句剪輯而成，包括當時佢喺立法會寸寸貢咁講：「又唔守規矩又冇禮貌，我唔會再答佢（涂謹申）嘅問題」嘅囂張金句，加上混音效果，八方聽番都忍唔住嘆一句：「不想回憶，未敢忘記。」
落區嚇親小妹妹
不過，葉劉一招同「昨日之我」劃清界線嘅策略，噚日落筲箕灣耀東邨派單張時，仲繼續玩認低威。葉劉話，佢已經向市民道歉（但強調當時23條立法原則冇錯，只係推銷手法唔好啫！），有啲市民接受，有啲人就唔接受。好似影大合照時，葉劉想打親民牌，捉住個着粉紅色衫嘅細路女影相，但係小朋友嘅反應好直接，鍾唔鍾意擺晒出嚟，葉劉拉極個小妹妹影相佢都唔肯制，搞到葉劉尷尷尬尬咁放棄咗。
喺泛民公佈初選結果之前幾分鐘，葉劉已經同記者講，陳太好大機會勝出，仲話歡迎多啲有豐富行政經驗嘅人參選喎。八方同佢傾開，見佢早前喺記者會度話自己冇「酒凹」笑得唔靚，就問佢會唔會做吓facial，至少keep住啲皮膚吖？但佢諗都唔使諗，就同八方講：「facial就冇，運動就成日有做！」
