民建聯噚日喺尖沙嘴星光大道為新一屆區議會選舉搞誓師儀式，但八方發現最有星味嘅，唔係嗰幾十個區選新丁，反而係場外一位長髮姑娘，只見佢一直喺民建聯今屆力捧嘅新星陳百里身邊徘徊，仲喺活動期間整粒香口膠畀阿百里醒神，關係非比尋常喎。
廣告公司任執行董事
八方打探之下，發現呢位跟得女友，原來係導演黃百鳴嘅愛女，名叫黃漪鈞Alvina。現時喺一間廣告公司任職董事總經理嘅Alvina，約喺一年前嘅一個上市公司活動中認識現年31歲、任職公司執行董事嘅陳百里，到半年前兩人至擦出愛火花。對於男友參選，Alvina當然好支持，仲話唔介意拍拖時間少咗㖭；咁又係，最多咪好似噚日咁，寓拍拖於助選囉。
黃小姐除咗親身撐男友，據聞佢爹哋都幾支持陳百里。話說有次陳百里喺牛池灣搞地區活動，搵咗粵劇名伶謝雪心對唱，黃百鳴山長水遠都有去捧場。不過，Alvina話爹哋唔會幫手助選喎。