八方早前寫過，余若薇大狀同聖雅各福群會合作搞個GreenLadies慈善舊衫義賣活動，個活動噚日舉行，結果喺余大狀嘅號召下，唔少名人都慷慨捐出唔少靚衫，三日間就收到至少1,200件女裝。
其中施南生嘅衫就超級受歡迎，據知佢捐出嚟嘅嗰批衫，一、兩個鐘頭已經俾啲太太掃清光；其中，施南生着去出席康城同柏林影展嘅珍貴旗袍，仲喺義賣開始時，即以2,800蚊高價賣出，為佢哋打咗支強心針。
余大狀嘅衫都好搶手，但佢最大貢獻，係出完衫又出力，做埋活動司儀；據聞佢嘅愛將Tanya陳淑莊都喺現場執到唔少筍貨，超開心咁話。最後佢哋喺短短6個鐘就籌到至少兩萬蚊，破咗聖雅各福群會舊衣義賣嘅善款新高，犀利。