唐唐出任政務司司長三個月，上星期終於正式搬入山頂白加道官邸，仲喺度過埋中秋節㖭。噚日唐唐同太座郭妤淺擺入伙酒，邀請60位傳媒參加。
宴客紅酒每支過千元
唐唐同八方講，原本諗住叫人去超市買啲一般紅酒招呼傳媒，費事動用佢嘅私人酒窖存貨俾人話奢侈，但最後都係出動私伙法國紅酒CertandeMay1983（enMagnum），同白酒MeursaulgLesPerrieres2000。聽講雖然隻紅酒唔算頂級，但質素唔錯，每支賣過千蚊。至於白酒就屬中價貨，每支都要幾百蚊。
講番唐唐官邸，今次用咗320萬元修葺，聽負責今次翻新工程嘅建築署建築師Raymond講，工程最大支出係更換官邸落地玻璃窗，同埋重新鋪設官邸門外有輕微沉降嘅車路，用咗250萬元。室內裝修就用咗30幾萬，主要係加建一個客廁、喺室外花園建木平台同將官邸嘅旗杆由花園搬到正門口對出嘅空地。
另外，煲呔用開嘅魚池同泳池就冇變動，唐唐話，魚池嘅八條錦鯉係新買番嚟。八方問唐唐滿唔滿意呢個新官邸嘅風水，唐唐就話最緊要住得舒服順眼。計八方話，最順眼當然仲有官邸望出去嘅超級無敵維港景啦，有錢都未必買到。不過再睇番過去呢座官邸嘅主人，能夠升到「冧巴溫」做阿大嘅，就只有煲呔一個，唐唐有冇得問鼎特首，憑呢點就未睇得到。
陳太葉太係純種好馬
唐唐又同八方講，上任三個多月都算好彩，因為兩個大炸彈：西九同政改都冇咩點爆到，但佢就對政改唔係太樂觀，因為社會上始終仍然有分歧。作為港島區選民嘅唐唐，當然唔可以唔提陳太同葉劉參選立法會啦，唐唐大讚兩位阿太各有千秋，如果用馬比喻，兩位阿太都係純種好馬，至於佢會投票畀邊位，唐唐就以一貫笑笑口回應，即係唔表態啦。
講開又講，噚晚唐唐太座郭妤淺特登以家傳秘方，教曉官邸廚師做秘製叉燒，成為今次入伙酒其中一道菜式，八方試過，味道認真唔錯。唐太同八方呻，話老公做咗政務司司長後，老咗好多，唔單止多咗白頭髮，脫髮情況仲嚴重咗，每晚仲要成9點過後先返到屋企食飯。佢仲話，𠵱家每日會留意新聞，睇吓老公有冇俾人激親，唔怪得話一個成功男人背後一定有位賢內助，真係羨慕死唔少男士。