數碼達人：Blue-ray睇魔龍<br>質感靚過戲院睇

數碼達人：Blue-ray睇魔龍
質感靚過戲院睇

今個星期無論係Blu-ray定係DVD都比較淡靜，名氣比較響就要數到呢隻《俠影魔龍》Blu-ray版。雖然以故事來講，都係西方古裝魔幻武俠劇情，不過若想用來睇真啲屋企套AV器材，呢隻Blu-ray絕對值得推介，因為畫面暗位比較多，只要電視層次、反差比較低，可能乜都睇唔到，絕對係試機之作！

記者：許福合

魔龍成長記

■伊拉岡意外地找到飛龍蛋，並且成功孵出小龍。

■小龍佔戲份雖然好少，不過外表非常討人歡心。

■飛龍終於成功長大，仲識得飛㖭。

■全隻睇飛龍更有氣勢更威猛。

■飛龍表面好有質感，效果真實。

畫面多黑位

《俠影魔龍》可能因為係魔幻式電影，用上唔少奇幻式拍攝特效，雖然筆者睇落欠缺壯觀有氣勢場面，不過整體來講都算拍得中規中矩，有紋有路。尤其去到BD版，特別效果嘅「效果」好似變得更為強烈，部份畫面仲變得好立體，如最後伊拉岡殺死戈巴托一幕，光影效果非常正，DVD版絕對睇唔到呢種Feel！另外，全碟總括來講都係偏暗，記得睇DVD版時因為畫面太黑，要校光啲電視先睇到，不過就令到成個畫面光晒，無晒嗰種奇幻感覺。今次BD版雖然畫面仍然好多黑位，但至少唔使特別調校電視光度，黑位都見到嘢，戲味出番晒！

必Check位

■畫面暗位比較多，考驗電視黑位表現能力。

■水花四濺場面表現BD碟銳利嘅特點。

■噴火配合特效，場面震撼，效果逼真。

■畫面特效比DVD版更出色。

■人海場面，可以考驗電視解像度。

魔龍太逼真

好多人去戲院睇完《俠影魔龍》，都會話飛龍唔夠逼真，但今次睇到高清BD版，筆者就覺得飛龍逼真咗好多，尤其近鏡拍攝時，飛龍表層好有質感，非常真實。但睇埋飛龍頭，高清畫面又令佢現晒形，因為當飛龍有表情、發聲，都好明顯睇到人形嘅臉部動作，呢點就有啲失敗！
講完畫面，聲音都值得一提，《俠影魔龍》採用嘅係DTSHD5.1音效，雖然無子彈橫飛嘅場面，但有幾場飛龍高速飛行畫面，都可以聽出DTSHD5.1位置感強烈嘅特點，而整體音效都相當出色。