觀眾眼睛係雪亮嘅，影視及娛樂事務管理處喺8月處理嘅投訴，可以證明呢點。有關投訴主要係分別喺今年6月30日、7月1日、7月7日及7月8日，無綫翡翠台同亞視本港台，播放嘅一系列慶回歸節目之中，播放歌曲《始終有你》，令人聯想起以同一首曲但改咗歌詞嘅《福佳始終有你》，再從而聯想到粗口「仆街」咁話。
大家睇到呢度，真係不能不佩服香港人嘅創意，因為網友林忌填嘅《福佳始終有你》真係深入民心；但係我哋唔好忽略投訴者嘅心思，因為佢哋並唔係投訴《福佳始終有你》唱衰香港，而係去投訴電視播嗰首唱好香港嘅《始終有你》，咁就證明「公道自在人心」，好可惜，最後影視處話「歌曲或節目均沒有粗話，投訴理據不足」。