張敬軒喪玩兩主題公園
「如果有內地親戚來港旅遊，梗係帶佢哋去廸士尼同海洋公園（圖）啦，其實我之前有好多親戚都係為咗呢兩個地方而嚟，其次就係帶佢哋去長洲同南丫島，因為內地比較少呢啲好漁村感覺嘅地方，如果有小朋友一齊，去感受吓大自然，好值得一去，唔好成日淨係去尖東shopping嘛。」
王友良維港睇醉人夜景
「如果有內地朋友嚟香港，我會帶佢去維港睇夜景，因為維港係全世界公認嘅一流夜景，亦係一處好值錢嘅地方，我知喺日本有介紹香港名勝旅遊書，都會推介去維港，既然個地方咁有價值，咁叫內地朋友去睇夜景，順便吸吓財氣都好嘛。」
李彩華感受中上環魅力
「我會帶佢哋去中上環，因為我自己喺中上環區長大，除咗對呢個地方好熟悉之外，我覺得嗰度有齊最古舊同最新潮嘅嘢，好似蘇豪區可以飲酒，上環可以睇古董、去文武廟拜神，隔籬就係我讀嗰間小學，附近又有好出名又好食嘅牛腩，好過去尖沙嘴或者銅鑼灣shopping。」
鄧麗欣天壇大佛夠特色
「我會帶佢哋去大嶼山天壇大佛，大佛係香港名勝之一，而且嗰度風景真係好好，又有市集，買吓啲特色嘢，而且上大佛條路，要行成二百級樓梯，可以試吓行，我自己就要分兩次行先行得晒。」
採訪：胡比、魯萍、王崇穎
