韓國電影近年喺國際影壇嘅地位逐步提高，今日介紹嘅韓片《密陽》，女主角全度妍就係憑呢齣片奪取今年康城影后美譽，繼張曼玉後第二位獲康城影后嘅亞洲女星。現實生活就威到盡，不過喺片中佢嘅遭遇就認真悲慘，邊個話一定係戲如人生㗎！ 撰文：戶川淳
全度妍喺下月11日上映嘅《密陽》中扮演一名喺首爾生活嘅女性，老公因車禍離世之後，佢帶住囝囝到老公家鄉密陽市居住。大城市成長嘅佢去到韓國鄉下生活，努力融入當地嘅社會，甚至開辦一間鋼琴學校，可惜徒勞無功，跟鄉下人始終格格不入。
戇男在旁扶持
寡婦全度妍帶住囝囝，第一日去到密陽市，就遇上憨厚嘅汽車維修店老闆宋康昊。雖然全度妍好討厭宋康昊經常煩住自己，但男方依然默默支持佢，仲喺佢大力協助下，令鋼琴學校嘅學生數目日漸增加，囝囝亦開始適應新學校生活。
可惜當一切漸上軌道之際，囝囝突然被綁架，令全度妍方寸大亂，最後囝囝仲被綁匪殺害。大受打擊嘅全度妍雖然篤信基督教，但信仰未能平復佢嘅傷痛，佢喺絕望之中決定向上帝宣戰。
自從得咗康城影后，全度妍就被韓國人追捧為國寶級演員，更得到政府頒發文化勳章作表揚。不過，早年曾喺電影《你是我的命運》中演活愛滋病妓女角色嘅佢，收到劇本時都好擔心，怕自己唔能夠充份表現角色嘅情緒起伏，仲試過有場戲由於太難演，索性同導演講演唔到。好彩曾執導《愛的綠洲》嘅導演李滄東都好體諒，畀佢揣摩好角色，稍後至補拍。
搞笑紓緩氣氛
全度妍今次喪夫又喪子，但查實現實中嘅佢喺拍攝時期，正與圈外男友密運兼籌備婚禮。當時佢話自己將工作同私人生活分得很清楚，所以拍攝時冇特別感受，不愧為專業演員。
年初憑《韓流怪嚇》攞咗本港「第一屆亞洲電影大獎」影帝嘅宋康昊，今次演出情深得嚟又儍頭儍腦嘅角色，令電影沉重嘅氣氛得以紓緩。宋康昊無論戲裏戲外都教咗全度妍好多，唔怪得女方經常都喺公開場合度，多謝呢位影壇前輩啦！
密陽小八卦：宋康昊街谷旅遊
電影嘅拍攝場地密陽市，位於韓國南部慶尚南道，人口只得約12萬。導演李滄東選擇喺嗰度拍攝，主要貪個名「密」字有「秘密」同「稠密」嘅意思。密陽市畀人陽光充沛嘅印象，但導演偏偏揀極陰暗嘅地方拍攝幾場戲，務求突出電影主題。市民同街坊都好開心電影令密陽市揚威海外，唔單止封兩位主角做榮譽市民，又打算將拍攝場地一帶改為「全度妍街」、「宋康昊街」，藉以推廣當地旅遊業。