預科生H生得大隻，或者係過肥，五呎九吋高，一百八十幾磅重，平時鍾意打網球，甚少病痛。點知呢日在家中聽見電話響，急忙走出房門，衝去客廳聽電話，一腳踢中電話座旁邊嘅座地電風扇，痛到流眼淚，於是走去睇相熟嘅街坊跌打醫生。跌打醫生同佢摸下腳趾，摸到腳趾尾，立即同預科生講：「你立即去醫院搵骨科，我唔敢醫你。」
預科生H立即搵老竇，佢老竇向左丁山求救，左丁山於是立即打電話搵醫生C，醫生C剛在醫院做完手術，不忘警告左丁山：「喂，你今日講跑步傷膝頭，未免班門弄斧，寫呢啲嘢，最好問吓我先。」醫生C睇膝頭傷病次數之多，不計其數，佢咁樣講法，左丁山點敢駁嘴。最緊要係搵到佢願意即日下午同預科生H睇症啫。
六合彩唔見有得中，一腳踢中電風扇，預科生H嘅左腳尾趾趾骨竟然彎咗，俾條筋纏住，要勞煩醫生C在醫院為佢開刀，矯正，用一條幼似牙籤嘅金屬釘穩住趾骨，預科生H睇怕要坐成個月輪椅。好彩年輕人在成長階段，可以復元得快，如果係老人家就有排煩。吸取預科生H之教訓，我哋做任何事，千祈唔好擒擒青呀，尤其是電話響，咪話之佢囉，聽唔到唔使緊張嘅。左丁山有時見到啲長者一聽到手機響，就手忙腳亂，好緊張咁到處搵電話，實在係自製神經緊張，對心臟有損，撞親手腳，更加無謂。
啱啱有讀者來電郵，問左丁山以前講過中醫治眼睛飛蚊、耳鳴之藥方。既然受咗醫生C之教訓，講醫療之術，實在係班門弄斧，都係冇謂在此張揚咯，唔敢講。請讀者自行搵中醫、西醫治病可也。如一定要補一補，或者可以讀一讀已故著名中醫師江一葦嘅著作《診餘筆記》、《食療精選》等幾本書，由星島出版社在十幾二十年前出版，公立圖書館或者會有，想在書局買到，恐怕不容易。