陳見飛現時與台灣組合Tension的成員李涵之（Andy）拍拖，她前晚在貝沙灣出席時裝騷時，透露拍拖令她心廣體胖，連上圍都勁升成Dcup，令她甚感不便，但男友愛其豐滿身段，力阻她減磅縮胸。
本地設計師何國鉦（DorianoHo）前晚在貝沙灣舉行07秋冬時裝騷，30套新裝由名模姚書軼、陳嘉容、Ren、「翻版關之琳」Jocelyn等演繹，姚書軼拖着精靈小狗出場，十分搶鏡。前晚活動事先張揚傅明憲會自老公葉劍波被捕後首度現身，但最終沒有亮相，全場焦點轉而落在穿deepV晚裝、性感上陣的陳見飛及榮雪梅身上。
「拍拖開心就肥」
陳見飛是晚與男伴同來，她說：「呢個係朋友，我男友喺上海開會，我已經半個月冇見過佢，惟有日日通電話。唔知點解我每段感情都係要兩地分隔，真係慘！」兩地相思，但何以日益發福？她說：「我一拍拖就開心，一開心就肥，本來喺加拿大都唔覺，返到香港同其他女仔企埋就好覺眼。」
陳見飛直認上圍升級，她說：「我肥咗十幾磅，全部肥晒喺個胸度，我本來係Ccup，𠵱家Dcup，啱啱加拿大返嚟時，啲人仲以為我做咗手術隆胸，我覺得太大唔好，着衫好唔方便，我想去減肥縮胸，不過男友話唔好，佢好鍾意我𠵱家嘅身材，連爹哋都話，香港女仔好多恨都恨唔到。」
黃寧艷精挑女傭
近日張學友狂換菲傭事件鬧得熱烘烘，林建康太太黃寧艷透露家中長期有五名女傭，但甚少換人，她說：「我有一套標準，會揀啲之前喺新加坡工作過，而且幫同一個僱主做咗四年以上嘅女傭，咁一般都比較聰明聽話又穩定。」
採訪：JessicaNgan
攝影：ChanShunChing
