羞恥之心，並非人皆有之，森巴舞本來流麗漂亮，但加了欺騙蠱惑之心，舞步就變成核突扭屎忽。
女足世界盃決賽，巴西女足對德國女足今晚舉行，心願希望巴西輸波，點解柴佢台？其實本來冇乜特別偏好，但睇完準決賽，巴西4:0贏美國，計球數清脆利落，講技術腳法亦勝三籌，贏波確實合理。不過，那位有份入球之詐死前鋒，好像叫姬絲蒂安妮吧，球品之賤，足以染黑全隊。
現代球場，周圍都有鏡頭，球證肉眼可以發盲，但終歸真相仍會揭露人前，明明是巴西球員自己跑到失蹄，撞落人家身上跌倒；卻即刻豎起兩根手指，擺到明計住美國隊的博絲已有一黃在身，球證趕其出場，奸計得逞時又立即歡呼做勝利手勢。出術毫不閃縮仲聲大大，衰到你服。
也許這是巴西足球固有風氣，02年世界盃李華度比人省中個身，卻乘機扮嘢掩面倒地，令到土耳其的哈根安素被趕出場。後來被判罰款，還要厚顏無恥話：「踢波就係要狡猾。」廉署的德育資源網，當年曾以此作討論題材，5年後的今天，可以改個新版本。
張美德
[email protected]