今個月尾就31歲嘅陳彥行，近日標尾會，唔止倒戈無綫加盟亞視，就連感情方面都有新開始，舊年仲話未有男朋友嘅行姐，呢排同一名麥浚龍和曹永廉混合體嘅男子拍拖，大前晚佢哋一齊喺銅鑼灣遊車河，表現非常合拍，勁有默契。
上圍迫爆衫
當晚7點幾，行姐男友開一部落地11年嘅雅閣房車，接女友夜遊銅鑼灣鬧市，途經天后嘅英皇道時，忽然停埋路邊，跟住行姐就落車行入萬寧買嘢，雖然近年行姐甚少性感示人，但着住緊身白恤衫嘅佢依然難掩好身材，36D上圍近乎迫爆衫，望落去相當養眼。
至於佢男友就趁呢段時間落車，見佢牛記笠記，打扮casual，不過舉動就有多少騎呢，竟然專登落車「採礦」，手拎紙巾係咁清潔鼻孔，兼且採得極之肉緊，依牙鬆槓，冇耐行姐行出萬寧，男友竟即刻扮冇事，嗱嗱臨接埋女友上車，踩油離開。
其實早排都有雜誌影過行姐同呢位男友喺長洲拖手仔，佢哋情到濃時，仲喺街頭激吻，睇嚟戀情處於白熱化。
