紫微楊停筆月餘，最近突然復出，九月十五號開始出稿，讀者有驚喜，自然高興。左丁山睇報紙馬經，平時唔多留意，但到咗賽馬日，就比較小心閱讀，睇吓派別不同嘅各式各樣「專家」有冇獨得之秘。哈，九月二十六日賽馬日，某報有一位以術數評馬嘅專家，喺佢嘅專欄內講到，當日係丁亥年，乙酉月，癸亥日，賽馬時間係己未時、庚申時、辛酉時，金水皆旺，故是日以金水馬為投注對象。邊啲馬係金係水？左丁山當然完全唔識，亦唔得閒研究。但呢位專家又提到，第八場九號馬「八逢九紫」，八屬土，九紫屬火，無金無水，是日不宜投注落去。
好嘞，「八逢九紫」嘅馬主就係胡定旭、紫微楊、顏文雄，採用一個咁奇特嘅馬名，考起全港評馬人，不明所以，梗係紫微楊嘅主意啦，至於係甚麼意思，希望紫微楊可以解釋吓，益吓啲馬迷。
呢場馬其實並無勁敵，舊馬已經見晒底，「八逢九紫」係質新馬，上季尾跑過一段幾好睇，大部份評馬人都認為「八逢九紫」有力贏馬，左丁山一早嘜實。但睇見術數專家咁樣寫後，直情係指呢隻馬與當日八字唔夾，有冇咁蹺呀？於是打電話問八卦邱，八卦邱唔識賽馬嘅，但一聽完左丁山報告咁咁咁，佢立即講：「紫微楊何許人也，揀正今日出賽，一定計算清楚，你一於買落去『八逢九紫』啦，『八逢九紫』碰上第八場九號，乃天作之合，整定紫微楊拉頭馬威威嘅。冇錯，八屬土，九屬火，下午三至五時係庚申時，庚申納音係石榴木，木剋土，庚與申乃陽金，而金生水，九月二十六日係癸亥日，納音大海水，正式係金生麗水，而水剋火，水係火之財，掂嘞、掂嘞，可以買多啲，當係紫微楊送禮畀你。」問多句，「『八逢九紫』係乜嘢顏色──騎師着嗰件衫呀？」哦，即係件綵衣啫，望吓報紙，乃係紅色加紫V，以此回答，八卦邱佢大嗌一聲：「紫微楊算無遺策，顏色都啱埋，紅色係火，更加啱！」左丁山是日輸到第八場，已經暈暈哋，揸望遠鏡望沙圈見到胡定旭，與紫微楊二人神采飛揚，面色好到極，先至記起八卦邱之言，急忙下注「八逢九紫」，隻馬一條直路殺上，輕鬆取勝，令左丁山起死回生，多謝紫微楊！