寶威控股（024）7月中股價高見2.35元後向下調整，月中宣佈業績盈利倒退，股價再反覆回落到1.30元水平，可趁低吸入，整固完成後，初步可重上8月底的1.87元。
上一次推介寶威，係4月24日，話佢密斟海外開礦，股價會大升，當時係0.76元，短短3個月內，上升兩倍，食咗一轉，家下又可以部署食第二轉。
6月初，寶威配售8000萬股，每股作價1.50元，全部畀基金要晒，包括瑞信3000萬股，Keywise同LeggMason各2500萬股，現時股價低過配售價，買得過。
寶威主要經營鋼鐵國際貿易、鋼鐵加工、房地產投資，以及透過聯營公司經營內地彩票業務；6月初正式進軍礦產資源業務，加多一瓣。
寶威在菲律賓開採氧化鎳，已進行前期勘探工作。寶威的商業模式不是買礦，而是類似風險探礦，相比較在市場高價買礦，更為謹慎小心，一旦探礦成功，投入少，回報卻大，寶威日後亦會循此方式，開拓其他地區的天然資源業務，爭取最大回報。
華彩進入收成期
講番業績，07年度（12月年結）的上半年，營業額26億元，升31%，經營利潤8547萬元，升120%，股東應佔盈利5122萬元，減73.1%，每股盈利4.93仙，不派中期息。盈利減少，主要係華彩控股（8161）發行新股，集團持有權益由21.75%攤薄至20.64%，錄得收益3885萬元，而去年同期則有2.12億元。
華彩現時係創業板市值第二、三大的公司，擁有中國兩個全國性獨家彩票系統同設備合約（視頻彩票同KENO），同全球最大博彩系統供應商IGT結成聯盟，對方投入1億美元持有華彩約10%股權。
華彩經過1年多的部署和投入，已開始進入實質收益階段。
寶威單係持有華彩股份，每股已值1.32元，另外揚州時代廣場升值亦頗可觀，令寶威每股實值可上升至2.30元水平，現股價偏低，好吸引。