筲箕灣東大街多嘢食就係人都知。但對於住在九龍新界，又無私家車的「11號巴士」乘客，就算搭地鐵都成十幾個站，唔通搭一個鐘頭車食碗魚蛋粉然後返屋企咩！嚟緊國慶，東大街將有巡遊滙演，舞獅、飄色、步操……嘩，果然「舞動全街」！為食貓一於食住上，為十一遠征東大街。為免到時盲舂舂，倒不如事前做足功課，嚟個東大街美食攻略，等大家睇巡遊拍晒手，嘗美食停唔到口！
記者：馮冠芝
攝影：陳盛臣
模特兒：Yan@IG綜藝社群
後起之秀 勝在窩心自在
去親東大街總見一條條的人龍排在招牌老店門口。其實，東大街有些開了幾年的新秀小店，在競爭激烈下依舊屹立不倒，自有其生存之道。好似本身在紅磡出名，空降東大街年多的潤記甜品靠「母親之手」，強調材料新鮮，100%Homemade，糖水滋潤清甜，小食無落味精，簡直係阿媽的煮法，教人嘗味又嘗人情。而另一間開了約兩年的日本壽司店「隨您鍾意」，名副其實地靠你雙手任點壽司。後起之秀全部有一手，國慶當日入去食完再看表演秀。
紅粉菲菲$18（a）
以士多啤梨取代芒果的楊枝甘露，以為更為甜入心扉，入口才知我們平時被人工士多啤梨味寵上天，真正原粒士多啤梨清香，微酸卻天然。
椰皇鮮奶燉蛋白$25（後）、
蓮子白果海底椰$16（a）
以為椰皇蛋白甜到漏，但食落卻只微甜，椰子還帶清香。蛋白唔算太滑，但椰香傳到隔籬屋，已是值回票價。蓮子清白果甜海底椰潤喉，夏去秋來，這糖水活像你剛燒烤完，老媽煲給你般，清甜而窩心。
午市自選10件壽司套餐$35（b）
國慶當日睇完升旗禮與步操，一家大細可以去食壽司，午餐19款壽司選10款，激抵價$35，果真「隨您鍾意」。有火燄八爪魚、鮮蝦、赤貝等，套餐午巿供應連汽水（11:00am-2:30pm），絕不行貨，十分抵食。
卧虎藏龍低調名牌
國慶當日約2點有飄色表演，看到可愛的小孩面無懼色在高空中表演，誰能想像他們平日扭買玩具的模樣？小孩卧虎藏龍，東大街亦有餐廳唔聲唔聲嚇你一驚，又奪美食獎，或者成條魚條上，實力十分之強。
鴻圖吊燒雞$88/半隻（c）
奪第一屆美食之最大獎的菜式，贏在雞皮脆而香口，怕肥?腦後，雞肉滑，滷水味不會搶去雞味，睇住電視嘆美食，人生一大樂事也。
淨香葱魚蛋（前）$17、魚條湯上$26（d）
東大街招牌之二，香葱與魚膠混成一體，人手逐粒唧出，葱香遊走在彈牙魚肉間。魚條則味道鮮濃，咬一口，魚味像鮮魚躍於口中。
招牌醬方骨配爆爆米$78（c）
用甜酸汁燜新鮮腩排達6小時，腩排入口溶化，好食到講不出話。爆爆米即鍋巴，蘸點酸甜汁，脆口不膩，必試。
招牌老店 等出好味來
熟客嘗新店，新客當然不要貪新鮮，要試試最出名的咖喱及魚蛋粉。以下「街頭名店」平時周六日都排個水洩不通，閒閒哋等半粒鐘，何況國慶當日！但若你無去過恆河與安利，真係咪同人講你去過東大街！絕對唔係羊群心理，只要你試過就知人哋紅得有道理。
咖喱炒花蛤$50（e）
印度菜食海鮮並唔係講笑，南印度近海，又被西班牙統治過，煮海鮮都有一手。越洋在港，以大大隻花蛤代蜆，咖喱依舊香甜，花蛤無沙，鮮甜彈牙。邊個話印度得雞羊牛？
印式香料烤豬手$80（e）
停賣了一年的豬手再戰江湖！豬手用香料燜腍入味、風亁再烤，過程起碼要2小時。豬手皮脆口過薯片！
茄汁咖喱燴烤雞$55（e）
以印度香料、番茄Crossover歐洲香草小茴煮成的茄汁咖喱，濃香惹味，跟以炭爐香烤的雞塊極襯。
切腩魚片頭豉油撈$26（f）
集安利三大王牌，網友話切腩太肥，原來肥瘦要在落單時講。魚片頭魚香四溢，豉油撈粗彈牙夠味。
（a）潤記甜品（23344423）
東大街14-22號東旺樓B舖
（b）隨您鍾意（25689011）
東大街37號
（c）粥棧小廚（25670877）
東大街東寶大廈地下2B舖
（d）王林記魚蛋粉（28860068）
東大街10號東寶大廈地下A號舖
（e）恆河咖喱屋（25601268）
東大街59-99號東威大廈11號舖
（f）安利魚蛋粉（25138398）
東大街22號及55號地下
漏網必殺
君滬鍋貼大王（28581368）
東大街59-99號3號舖
賣點：10蚊5隻鍋貼，阿姐一路包一路煎，香口抵食。
大板牙食品直銷（28860773）
東大街59-99號8B號舖
賣點：水泡餅、汽水粉、眼鏡朱古力，懷舊零食應有盡有。
第3屆筲箕灣國慶巡遊滙演
當日約70多個團體於東大街表演，如舞獅、飄色、民族舞等。屆時會實施人潮管制，並進行封路，車輛不得經過。
日期：10月1日
時間：9:30am-3:00pm
查詢：94551977（郭小姐）
