昨日H股指數又再創新高,急升373點,突破17000大關,所謂資金推動升市,莫過於此。據國內報載,緊隨南方基金進行首次發售的華夏基金,首天認購額已達600億元人民幣,超過南方基金的500億元。
據報章引述消息透露,該基金最後額度有可能達到50億美元,折合人民幣約375億元左右,如能成行,這一規模也超過了南方基金推出的首隻QDII基金的40億美元。連同將於假後推出的兩隻QDII基金,假設每隻40億美元,短期可能來港掃貨的基金總額已達170億美元。
由於基金剛剛募得資金,實際上還未來港買貨,故此近日掃得兇狠的大市值中資股,明顯來自偷步掃貨的其他炒家及基金,當然亦包括賺錢至上的對冲基金,以及國內休市期間部署大炒港股的國內投資者。
有呢幾批資金射住,個市自然可以升到你唔信,所以有人鼓吹沽H股期指,可能係冇睇新聞,唔知北水正源源湧到。至於國內基金會買乜股票?大藍籌雖然有部份估值偏低,但數增長能力肯定非H股莫屬,另一個好處係H股大多屬國企,好少出現供股及賣盤等事件。最後,國內基金若唔買國內散戶熟悉之中資股,好可能會被客戶投訴。
中石油、中海油唔貴
基金經理買貨肯定謹慎過散戶,所以國內先放行QDII基金俾散戶認購,再開直通車係好合理做法。炒家任何時間都要緊貼市場新形勢,要跟呢轉資金搵食,就必揀H股同紅籌股。順帶一提,昨再創新高的中石油(857)及中海油(883)現價往績PE18倍左右,負利率年代,未算貴。