兒時常扭父母去睇煙花，騎膊馬腳撐撐仰頭嘩嘩叫；長大後，三五知己人海中你逼我我逼你爭位企；出來做事工作忙，難有力氣人龍中擠，有幾個錢，不如去露天海景餐廳，煙花就在頭上灑落，邊睇邊食輕鬆吓，比星級酒店有情調之餘，最最最重要是尚餘一日時間，那兒還有一席位可讓我優雅地賞花火！
記者：郭佩韻
攝影：周旭文、梁細權
模特兒：Rudy、Kelvin
IFC隱蔽意菜送甜品buffet
酒杯邀女伴，浪漫有seaview，最適宜情侶撐枱腳，如果有幫襯開IFC出名食意大利菜的lsolaBar，不妨試試其雙生意式餐廳Cafe'Costa，聽講lsola國慶當日已經滿booking，Cafe'Costa因位置較為隱蔽，在IFC的連卡佛入面，無入去行逛不會知其存在，所以雖然舖仔細細約30張枱，但勝在「隱蔽烏蠅」店較易找位。又查實無論環境及食物，這裏與高檔的lsola差異不大，特別推出4款意菜為國慶煙花晚宴，包括芝士烤雜菜、烤香辣三文魚、烤嫩雞或烤美國肉眼扒，當然少不了頭盤軟芝士配車厘茄牛油果亁番茄、輕煎吞拿魚尼歌斯沙律、薄切生牛肉片或雜菜湯，尚有廚師重點推介的南瓜野菌意大利飯，相信最得女士歡心一定是甜品自助餐，包任食芝士、新鮮水果及各式甜點，聽落已經夠吸引！
Cafe'Costa（21187600）
‧地址：中環國際金融中心連卡佛內
‧價錢：$488（成人）、$248（小童）
灣仔高樓BBQ派對
秋風起，凉凉哋，BBQ最合時，但市區有咩地方可一邊燒烤，一邊欣賞煙花？答案係酒店頂樓，位於灣仔的王子酒店，出名係夜蒲精落腳地，波樓、K房樣樣齊，位於23-24樓的King'sClub，在天台設有BBQ區，今個國慶節大搞煙花BBQ之夜，飽覽整個維港夜景。拍攝當日巧遇「幻彩詠香江」滙演，彩色射燈掃射如同射在腳下，無論是與情人一起，或是大夥兒𠵱嘩鬼叫，同醉！總好過出外同人逼。
環境情調80分，食物都很豐富，以任點任食方式，由駐場廚師即場為你燒烤，有燒大花蝦、焗生蠔、焗扇貝等海鮮，亦有薄燒牛仔柳、蜜糖豬仔肋骨、香草燒乳鴿等，還有多款沙津、熱盤及甜品，任點汽水及fruitpunch。
King'sClub十一煙花BBQ之夜燒烤派對（31883898）
‧地址：灣仔謝斐道303號王子酒店23-24樓
‧價錢：每位$398（成人）、$198（小童）
即撲海港城霸預留頭位
九龍友，首選尖沙嘴。靠近天星碼頭旁的海港城，有間開業不久的意式餐廳「HabituRistoranteThePier」，聽講平日都爆滿人龍，餐廳內設有露天及室內位置，但提提你露天位僅十數張。不過室內也可透過落地玻璃賞景，經理話仲有十幾二十張枱預留畀客人即日訂位或walkin，但先到先得，要早少少去搵個靚位啦！
Habitu國慶煙花宴食物包括意式貴族牛肝菌湯、燒番茄釀水牛乳芝士伴蘆笋黃甜椒汁，主菜有炭燒意大利山羊配鮮茄、亞芝竹及馬鈴薯、烤虎蝦吞拿魚配海鮮釀通粉及煙熏薯茸、香燒牛柳薄切伴紅酒汁及野菜、全麥闊條麵配意國豆汁，甜品仲有意大利鬆餅伴酒香燉蛋、沙巴翁及香橙雪葩，如果喜歡食意菜，又臨急想搵位邊睇煙花邊食飯，一於嚟呢度撲位！
HabituRistoranteThePier（31010901）
‧地址：尖沙嘴海港城海運大廈G63及G63A地舖
‧價錢：一律$488
