近來樂壇好似好熱鬧，無論本地薑定外埠嘅老中青歌手，啲演唱會開極開唔完，嚟緊就輪到大笑姑開演唱會嘞，不過關仁聽到個消息，話佢個騷啲飛就賣得唔多好，仲要變咗嚿豬頭骨，俾人當贈品咁搭送，大笑姑婆表面好似冇乜嘢，不過佢其實聽完啲新聞好唔開心。
自歎冇好歌
咁又係嘅，大笑姑婆出道咁多年來，佢嘅成績都幾好㗎，賣碟開騷拍戲瓣瓣掂，仲攞過唔少獎，點知自從佢轉咗會之後，人氣不升反跌。大笑姑婆同身邊啲人講，話個騷點解谷唔起，就係因為啲歌唔得，佢都知自己加入咗間新公司之後，一首hit歌都冇，但佢又唔敢同老闆拗，人氣下滑嘅佢惟有叫公司畀多啲錢佢搞舞台同服裝玩大製作，希望可以轉移歌迷視線，搞掂個騷谷番起啲人氣。關仁覺得做歌手始終係要keep住有好歌至得，如果淨係靠唱舊歌食老本，遲早俾人淘汰㗎！
Textby關仁
