大摩亞太區主席羅奇為亞洲協會演講（九月二十五日），中國會座無虛席。羅奇係唱淡派，認為目前恒生指數太高，港股國企股唔值得買，但中國股市只會有大調整（majorcorrection），唔會有股災（crash）。如果聽佢講而去沽空，喺九月二十七日就會輸死咗，不過羅奇係睇中長線，佢從事分析幾十年，如果冇次準，一早就離開華爾街啦，幾時輪到佢掌管大摩睇得好重嘅新興亞洲市場。
喺午餐會中識咗一位私募基金經理，到咗香港一年多啲，話明冇一個b美元嘅大刁，佢公司都冇興趣，佢話對傳媒業（media）有興趣，知道左丁山識得一點點本地傳媒之後，追問有乜投資機會。左丁山對佢講：「十億美元可以買晒成間大報館都得咯，問題係如何賺錢走人啫。」聽佢講，私募基金為咗留住人才，連佢嘅秘書都有股份派，真係令人羨慕也。
之後見到一位講廣東話、普通話、英文都字正腔圓嘅分析師，一如所料，來自北京，居港兩年。佢知道左丁山與傳媒業有關之後，竟然對左丁山講：「我睇你哋香港人比我們還要左，最近應朋友之邀，出席一個與廣告傳媒行業有關嘅商會理事會就職典禮，居然請中聯辦唔知甚麼處長主禮，頒發理事委任證書，典禮開始前要唱國歌，請處長致詞。我來自北京，知道我哋比香港更少來呢一套噃，原來中聯辦係你哋父母官呀。」左丁山為之啞然，以前一啲大社團舉行理事會交接禮，會請「華民事務司」高層主禮（現時民政事務局），可能香港社團多得滯啩，民政事務局官員疲於奔命，唔能夠到處去主禮，社團於是改為邀請中聯辦贈興啩！中國商人素來就喜歡攀附權貴，見到大官就矮半截，總希望有日做得到紅頂商人，故此從不批評獨裁，從不爭取民主，別人爭取之，商人會下意識地與之保持距離，甚至罵之唯恐不及，乘機向權貴交心邀功。對好多中國商人來講，去緬甸賄賂腐敗軍人拿取合約，遠勝於同情緬甸僧侶與支持緬甸人民也！