冰上曲棍球（IceHockey）喺美加同北歐都頗為流行，合和胡應湘個大仔胡文新出名鍾意打冰球，擔任香港業餘冰球會主席嘅佢司職後衞，技術仲唔差㖭。最近，胡公子為咗推廣呢個喺香港比較冷門嘅運動，搞咗間全港首創嘅冰球訓練學校，希望更多人認識同參與其中。呢間學校係非牟利性質，現時主要喺小學搞推廣活動，等啲小朋友明白冰球係乜嘢運動，有興趣嘅仲可以喺溜冰場上番一堂，feel吓玩冰球嘅感覺。
盼組隊參加冬季奧運
胡公子打咗冰球7年，覺得應該為本地冰球界出一分力，而且佢知道呢個運動要買好多裝備，價錢唔平，會令一啲有心人卻步，所以成立呢間學校，就係要畀多啲人接觸冰球。佢又話，如果遇到一啲有心而又有天份嘅小朋友，會資助佢哋做訓練，佢仲夢想第時可以成立一支專業球隊，參加2018冬季奧運會！
為咗隆重其事，胡文新專登透過入境處嘅優才計劃，由加拿大請到著名冰球運動員BarryBeck返嚟做學校嘅總教練。Barry雖然退休10幾年，但佢82至86年間做過紐約騎兵隊嘅隊長，仲曾經係加拿大國家隊成員，亦係唯一一個喺優才計劃成就計分制裏面嘅非中國籍優才，都咪話唔巴閉喎。