港台聽日起推出新一輪電視節目，親中陣營最鍾意炮轟嘅《頭條新聞》就會唞一排，到明年1月再播。港台噚日搞咗個節目巡禮，《頭條新聞》主持林超榮慨嘆，每逢有「大嘢」發生，好似近排兩位阿太互相出招咁，《頭條新聞》就咁啱停播，佢希望節目唔好停咁耐，長做長有；另一主持曾志豪就好冇癮咁話，股市有丁蟹效應，秋官一有劇集推出，股市就大跌；而《頭條新聞》就有相反效應，有得播時就冇嘢發生，冇得播時就大新聞接踵而嚟。
《頭條新聞》會暫由《傳媒春秋》頂住，喺無綫播出，由詞鋒銳利嘅毛孟靜同無綫前新聞主播李燦榮主持。李燦榮3年前俾無綫炒魷，佢噚日就大聲疾呼咁話「我喺港台重生」，唔知花哥收唔收到？