星期六最好嘅節目，梗係扭開球彩台睇意甲榜首大戰羅馬主場對國際米蘭！呢支首都球隊近期面臨「地獄賽程」，聯賽先後面對祖記、費倫同國米，下周中歐聯又要作客曼聯。
羅馬近兩場遇上強敵祖記同費倫，都只能和波收場。隊中首席射手托廸同柏路達受傷缺陣，確令球隊存在隱憂；反觀對手國米近況都一樣唔好，上周作客只能2:2賽和利禾奴，之前佢哋後防受傷兵同停賽問題困擾，現時已得到紓緩。
兩隊實力旗鼓相當，聯賽同樣保持不敗，翻查對賽往績，對上6季12次碰頭有一半開和，況且兩隊下周中有歐聯跟尾，和波對雙方應該收貨。
整多場西甲維拉利爾主場對畢爾包！「黃色潛艇」近況大勇，已經連贏3場兼不失球，相反畢爾包仍保持一貫「差」嘅作風，至今只係贏過包尾大幡利雲特。對上3季畢爾包作客都要輸波而回，相信今場都唔例外。
貼士
主客和2x1：
星期六48羅馬和（3.05）x
星期日32維拉利爾勝（1.55）
入球大細2x1：
星期六48羅馬大（1.85）x
星期日32維拉利爾大（2.05）
阿鵬
有線球彩台主持
電郵：[email protected]
Phone波熱線：1831678
開放時間：8:45pm-0:00am