這陣子，張敬軒大紅。他的新歌《酷愛》熱播，時下青年個個會哼。
一路走來不易的張敬軒，從前單人匹馬從廣州殺到香港搵食，A歌手一句「大陸仔」、B主持又一句「點解你哋咁鍾意踎嘅？」呂方還質疑他是馬拉人、內地新移民；但當下他能唱出生天，過去種種，不如笑忘書。
才26歲，張敬軒已銅皮鐵骨，老氣橫秋。幾個月前，他和緋聞女友王菀之去澳門做騷，遭持刀打仔要脅臨時加唱，刀光劍影中，他拚死保護女方；還誓言對方30歲嫁不出「我娶你！」然而緋聞似是而非，圈中屢傳那是煙幕計，實情他與關智斌關係曖昧。
如果要揀斷背情人，張敬軒說至少要關智斌的standard，「靚仔幾時都得人鍾意！」這答案，都幾有餘震！
撰文：朱倬誼 攝影：仇志德
事業篇
「身處在異地，在認路的我太過膚淺……」——《我的天》
從內地來港發展，孤身走我路的張敬軒雖然唱得作得，但無英俊面孔，又無漂亮包裝，要在5年前的偶像地盤打滾，實在像火星人降落地球。去年的《笑忘書》，終令張敬軒由地底浮上地面，近日的《酷愛》更令他大紅，熱播得街知巷聞。
不滿爭食報道
不過張敬軒不覺得吃苦，比上不足、比下有餘就是，他還輕鬆地說：「我唔覺我有捱過，因為一路人有我有，可能冇人哋咁多啫，我入咗環球5年，02年11月由廣州嚟香港，我未俾公司cut過保母車、未cut過梳頭化妝呢啲開支，至少一年出一隻碟，該上嘅節目有得上，每年頒獎禮，幾唔起眼都至少有新城一個獎，所以唔係特別霉，就算行內話新城嘅係豬肉獎，但你又真係見到有啲歌手坐喺度冇獎攞。」
被笑，被嫌棄，人在香港的張敬軒初來甫到時都試過，聽完張三李四講東講西，一顆心會下沉。「我第一年嚟香港，有次周刊登咗一幅我踎喺花叢度影嘅相，話『內地來港的張敬軒，很懂得搞特別的東西去襯托平凡的自己』，意思話我太平凡，要搵花草突出自己；我第一篇專訪，題目係『張敬軒來港搶飯碗』，我睇完個心有啲唔舒服，點解內地歌手嚟香港就係搶飯碗？點解香港歌手返內地發展就應份？但𠵱家唔會有咁嘅感覺，做咗呢行幾年，開始明白啦。」
呂方口快狂窒
「背後俾人話係大陸仔就預咗，大家一路覺得張敬軒好溫和，人哋話佛都有火，我又有乜理由冇脾氣？但因為我唔係本地人，做嘢要更加謙卑，呢個係我嚟香港前一晚，我阿媽好語重心長同我講嘅。」
同一個圈，有歌手、有主持都對張敬軒「刮目相看」，令他啼笑皆非，他說：「有次做騷見到呂方，可能我皮膚黑，喺個帳幕度，佢一嚟就問我『你係馬拉歌手呀？』我話『唔係，我廣州。』『廣州咪即係新移民？』『都唔係。』『咁你係乜呀？』『我攞workingpermit（工作證）』『吓？菲傭嗰啲呀？』佢個人好直，冇惡意，佢後尾都有話有留意我啲歌唱得好，但唔知我係邊度人囉。」
被問踎街尷尬
另一次經驗，令張敬軒真的有點hardfeeling。「試過有一啲，我唔知佢係善意定惡意：『廣州都有麥當勞㗎？』『廣州都睇到香港電視㗎？』係電台節目嚟嘅，主持問我『點解你哋咁鍾意踎嘅？』我話『又唔可以坐地下，咁咪坐爛晒條褲，咁咪踎囉！』其實佢意思係話點解尖沙嘴DutyFree門口有咁多人踎喺度，講真呢啲係內地傳統，日本人都踎㗎，點解唔問呢？因為內地人呀？當時佢咁問，我個心唔舒服，最唔舒服係問我『你點睇你啲同胞喺廸士尼門口大小便呀？』面對呢啲問題，只有如實作答，內地有好多人都係咁，我話大人唔會，係小朋友，內地嘅公民意識的確要培養，希望大家畀啲時間。有時唔舒服，會係呢啲位，但冇下文嘅，好似個電台主持，邊個唔好講啦，都過咗去，我唔難理解大家點解會有呢啲疑問，作為一個娛樂節目DJ，佢嘅口吻要有可聽性嘅。」
「張敬軒應該紅啦！」很多人都說過這句話，早前有網民更選他是「應紅不紅藝人」榜首，儘管大把人戥他唔抵，反而張敬軒定過抬油說：「紅與不紅好睇運數，有啲人係某啲時候做某啲嘢先有效，所以我覺得呢行唔係鬥邊個出風頭，係鬥長命。」
斷背篇
「彼此墮進灰網，沉溺、煩擾、磨折，何必多講……」──《笑忘書》
提起王菀之，張敬軒是又惱又疼，但說到關智斌（Kenny），他卻照顧周到，有讚冇彈。其實這大半年來，圈中盛傳張敬軒跟王菀之玩煙幕，他和Kenny才是真密友，張敬軒都知道，只是未有人兜口兜面問過他。對傳言，他有點驚訝，但很快回復鎮定，淡淡然解釋。
Kenny啱選港男
他說：「話我同Kenny搞基，唔開名嘅新聞我有睇過，得啖笑，仲要係王菀之攞畀我睇，我同Kenny係同年新人，成日一齊玩，但到舊年頒獎禮風頭火勢時，有篇文章係一夜之間，出現喺每一個張敬軒嘅網站，話我同關智斌地下情。我唔評論呢篇新聞喺邊度出嚟，係咪要喺嗰個時候攻擊我、基的疑惑令我人氣跌，但我不嬲最怕同我出入嘅所有人，被我嘅新聞所牽涉，嗰時我仲幫緊Kenny做碟，可能因為合作出現呢啲傳聞。」
張敬軒一夫當關，單擋斷背傳聞，下意識保護Kenny說：「我唔怕同性新聞，有呢啲傳聞，我覺得自己有魅力，唔覺得樣衰，講真唔失禮，關智斌OK喎，靚到咁，我哋成班人都話如果Kenny星途再係咁，不如去選港男啦。我哋覺得Kenny好勤力，所以有咁嘅傳聞，我仲係會同佢做碟，因為我好想佢紅，佢喺圈中人緣唔差，又從來唔行差踏錯，呢啲傳聞我睇完就算，最緊要唔好影響佢。」
假設性問題：如果張敬軒是同志，他會不會揀Kenny做對象？他即笑道：「至少呢個standard啦，咁佢靚，靚仔幾時都得人鍾意。之前雜誌寫我同胡蓓蔚，又話楊思琦，又傳味之天使，啲fans喺我官方網站全版寫『死人張敬軒，去死啦！』因為每個fans都覺得同你拍緊拖，所以對於我嚟講，寫我同男仔傳緋聞，佢哋會冇咁嬲，咁我就梗係鍾意女人，同性朋友對我好、鍾意同我一齊，係因為我細心，呢樣亦係我與生俱來。」
異性篇
「我們這結局太不堪，分不出真假的愛恨……」──《酷愛》
張敬軒和王菀之的緋聞傳了多時，你問張敬軒到底愛不愛她？其實他也迷茫，答不出所以然：「我同王菀之，係真係假分唔清。我真係好似一個男朋友咁照顧佢，我哋嘅開始係由友誼而起，我屋企人唔喺香港，佢係擔當我屋企人嘅角色，加上我哋同公司成日一齊做嘢，係培養感情嘅主要原因。除咗生理上之外，其他嘅嘢，王菀之都畀到我，我哋意見不合時會開片，但買吓嘢、𠱁吓，好快又冇事。有時我都好混淆，係咪唔經唔覺拍緊拖呢？」
拼死護王菀之
張敬軒徘徊在友情和愛情的邊緣，原來有段古。話說今年初，他和王菀之去澳門做騷，被一班刀客圍剿恐嚇臨時加唱，張敬軒掛個勇字在心口，竟然夠膽跟人家講數。
「我哋去到場館綵排嗰晚，有20幾個揸住利器嘅打手圍住我哋，話我哋好寸，加多兩隻歌都唔制，原來聯絡嘅中間人食咗好大嚿錢，應承人哋會唱多兩首歌，王菀之嘅生命中係從未見過咁嘅場面，從來冇人用把刀指住佢，佢係嚇到呆咗，我當時只知道，一定要保護王菀之！於是我同負責人講，話如果係咁，你聽晚會開唔成騷，如果要開騷，請你啲兄弟出去，跟住我攞份合約出嚟，大家至知俾人吞咗錢，好彩後來都解決咗，冇事，所以我同王菀之係共過甘苦。」
成情侶冇困難
共甘苦又未必可以成美眷，張敬軒對王菀之老是愛恨交煎，倆口子如歡喜寃家，他說：「我諗，我同王菀之會分別同唔同嘅人結婚，我應承過佢，佢30歲未嫁，我會娶佢。我同佢拍拖冇問題，隨時可以開始，但做情侶之後，友誼會變質，我哋唔夾嘅地方，係去到想郁手打，佢會嬲到覺得點解會識到張敬軒呢個人，我又好咬牙切齒，佢活喺自己世界，成日驚佢俾人呃，佢容易信人，我會好肉緊，而佢亦係我最好嘅紅顏知己。」
