近日袁彌明被指曾經與崔建邦拍拖，男方更盛傳因求愛不遂而要篤死袁彌明。昨日袁彌明舉起三隻手指發誓，聲言從未與崔建邦拍過拖，又指自己鍾意高大的男士，自稱五呎七吋的崔建邦看來並非她那杯茶。
袁彌明近日被指曾經與崔建邦拍拖，昨日她出席新都城活動時否認此事，更舉起三隻手指發誓：「從來冇同佢（指崔建邦）拍過拖，佢都有個好好嘅女友，總之同佢啲嘢唔好再提，加上我鍾意係啲六呎高嘅男仔，總之同佢冇火花。」崔建邦近日出發到珠峰拍攝，那麼袁彌明會否祝福對方平安歸來？她說：「祝佢平安，咁大隊人，應該唔會有高山反應。」
翠翠杏兒行騷𢱑銀
另一方面，胡杏兒、葉翠翠、曹敏莉及AmandaS.前晚以模特兒身份，在香港怡東酒店為某服裝品牌示範秋冬時裝，杏兒及翠翠近期不斷行騷𢱑真銀，對於近日有消息指崔建邦因求愛不遂而要篤死袁彌明，葉翠翠說：「我從來冇聽過，我哋三個係娛樂直播組，雜誌講嘅未必可信。」
監製證實繼續雪藏
提到袁彌明近日被飛出《娛樂直播》，葉翠翠說：「唔係自己新聞，唔好畀咁多意見同參與，我私底下冇見佢哋眉來眼去。」該節目監製梁儉恒昨日接受電話訪問時則說：「我可以好爽快答你哋，下個禮拜我哋都係冇編佢，其實有冇佢對我哋都冇影響。」
採訪：卓寶花
攝影：陳俊強
