《歲月風雲》中的華家三兄弟，是全劇的靈魂人物，苗僑偉（三哥）飾演的華文碩生性風流，他直認自己演得浮誇，更爆向來嚴肅的大哥劉松仁飲多兩杯就會變得風騷，又指飾演二哥華文鴻的內地演員廖京生則十分風趣，三兄弟各具特色。提到拍劇期間與梁靖琪傳緋聞，大爆妻子戚美珍圈中線眼多的三哥，笑言不敢行差踏錯。
苗僑偉在《歲月風雲》中飾演的華文碩，「搞搞震」冇建設，又風流又貪玩，但心地不壞，與他一向擅長扮演的紀律部隊或強者角色大相逕庭，不過三哥要求高，對演繹未感滿意，他說：「我喺呢套劇嘅篇幅比較少，有多少缺憾，華文碩個角色係由九幾年開始演到𠵱家，開頭演繹有啲浮誇，係咪做得最好呢？唔係，有得再進步嘅。」
「唔會亂搞廿四」
三哥眼中的華文碩，有好有不好，但非壞蛋一名，他說：「佢前期貪玩，但鍾意家庭同仔女，係唔生性、風流，見到女仔又撩吓，拈花惹草，但佢都識得返屋企，會𠱁老婆。華文碩係個花弗仔，佢由初時嘅花花公子，乜嘢都唔做，到經歷婚姻失敗、事業失敗，起落幾大，係有成長過程。」
三哥早前曾先後與同劇的佘詩曼和梁靖琪（Toby）傳緋聞，華文碩豈不像他的寫照？三哥笑道：「唔係我寫照，係似我啲朋友嘅寫照！點敢出嚟風流？咁多線眼，風流太危險啦！娛樂圈係花花世界，好多誘惑，但太太（戚美珍）知我係乜嘢人，我鍾意玩，多朋友，但唔會亂搞廿四，尤其我太太仲曾經係圈中人，仲多線眼，少少行差踏錯就俾人影相，佢都唔知幾咁安全。」
劇中華家三兄弟個性迥異，私下三哥與劉松仁和內地演員廖京生卻相當投契，他更大爆兩位兄長的趣事說：「今次係我同松哥第一次合作，大家太耐冇見，我哋第一日開工就拍嗌交戲，大家先交流吓，我同佢講：『松哥呀，你好，我係苗僑偉，做你細佬呀！』後來大家拍戲有溝通，知道松哥係個非常認真同專業嘅演員，公餘以外比較嚴肅，但其實佢都有輕鬆一面㗎，畀多兩杯酒松哥飲，佢就多嘢講啦，哈哈！」
枱底踢腳提場
三哥又笑說：「廖京生演出經驗好豐富，好nice，大家一拍即合，但初頭好好笑，因為佢未係太識廣東話，佢講國語對白，有時佢唔知由邊度開始接對白，於是就叫人哋喺枱底踢一踢佢隻腳，咁就知到自己要講對白。後來佢開始識聽廣東話，有次拍戲，馮紹峰（飾演華振民）又踢佢，跟住就NG啦，廖京生話：『你做乜踢我呀？我夠知到我啦！』佢幾風趣㗎！」
採訪：朱倬誼
攝影：林德雄
服裝：DKNY
場地：Tiffany'sNewYorkBar@海景嘉福酒店
搶先睇：為愛女放棄權力
第55集劇情講述華清瑜（宣萱飾）在懷孕初期不支暈倒，送院後發現妊娠高血壓，醫生吩咐她要小心照顧身體。危永標（馬德鐘飾）為了照顧妻子清瑜，突然取消跟華喆獨立董事會的會議。
華文翰（劉松仁飾）召開緊急董事大會，宣佈將權力下放，提出將華喆主席一職讓位給永標，本來以為文翰想罷免自己所有職務的永標，立刻如釋重負，放下心頭大石。華文碩（苗僑偉飾）及華振民（馮紹峰飾）離開華喆，決定合作開4S店，提供賣車售後服務。振民終鼓起勇氣，向方秉怡（胡杏兒飾）求婚，成功娶得美人歸。
