雖然國泰（293）夥拍國航（753）母公司中航集團收購東航（670）一事暫時告吹，但無損國泰行政總裁湯彥麟心情。國泰向波音訂嘅新飛機777-300ER就快投入運作，中秋前夕（美國時間）仲喺西雅圖搞咗個聚餐慶祝。
西雅圖收貨
貴為波音貴賓，國泰唔單止收飛機，仲有唔少禮物，包括有像真度99.9%嘅港美油畫，象徵新機營運後貫穿兩地；新飛機模型一架，同埋一對鯨魚母子。波音話，777-300ER係15年艱苦研究嘅成果，𠵱家終於面世，就好似鯨魚媽媽湊大BB咁，家吓終於長大，可以跟住國泰呢個世叔伯周遊列國，增廣見聞。
湯彥麟對呢隻「鯨魚BB」讚不絕口，仲提醒在場朋友，忘記近日關於其他飛機型號嘅負面報道，總知最好嘅已經喺眼前。華華數過，湯彥麟用咗不下5次fantastic嚟讚隻飛機，可想而知佢幾咁滿意。