每年意大利小姐選舉，總有一條問題同波有關：「小姐，你捧邊支球隊？」之前3年冠軍佳麗都捧祖雲達斯，今年都唔例外，新鮮出爐嘅冠軍巴廸絲汀（Battisti）又係答祖記，「老婦人」又再攞晒采。
講表現，祖雲達斯啲波實在唔好睇，升班後未重現霸氣；講靚仔型男，祖記近年走咗簡拿華路、森保達，剩番嗰幾粒星尼維特、廸比亞路、保方，唔係開始皺皮就係做晒住家男，新加盟嘅安達廸、基斯薛圖，衰啲講可以轉行拍戲扮野人。我求大俠好想知，何解呢隊波餐餐都吸引到全國最省鏡嘅女仔垂青？唔通真係祖記老字號，唔捧唔舒服？
問完捧邊隊，主持跟手自然問巴廸絲汀鍾意邊個球星，過去幾年嘅冠軍佳麗唔係答廸比亞路就係保方，巴廸絲汀呢位18歲小妹妹就係咁易答「好多個」敷衍吓。唔知係因為佢明知祖記球星個個有着落，送波？呀，唔係，係送秋波博傳緋聞都嘥氣，抑或係有代溝，根本講唔出啲uncle嘅名？
「王子」牛一唔開心
近日有調查顯示，意甲主要強隊嘅男女fans數目比例，多數係六四之比，僧多粥少，惟獨羅馬嘅比例係五五之比，即係呢隊波比較容易吸引異性，兩代「王子」托廸、阿古蘭尼好明顯喺場內場外都孭到飛。羅馬大軍年年都攞唔到呢個采，唔知係咪冇羅馬女fans有咁嘅質素贏到意大利小姐榮銜？
講開羅馬，噚日係「王子」托廸31歲牛一，可惜羅馬近兩場波都和波失分，而佢前晚對費倫天拿因傷缺陣，呢個生日未必過得開心囉。