平安保險（2318）喺04年上市時，招股價每股10.33銀，到前日收市已經升咗8.8倍，去到101.5銀，如果上市時抽中一手揸到家吓，唔計交易徵費賺45585銀。平保董事長兼首席執行官馬明哲對股民都算有交代。
馬總除咗帶挈股東賺錢，對社會都有貢獻。噚日華華收到個電郵，話馬總捐錢成立「明園慈善基金」，專門幫助貧困地區嘅青少年同兒童，佢出手一啲都唔輕，第一筆捐款已達2000萬人仔，仲話計劃5年內捐夠1億。
嗱，好多老闆都好慷慨，不過就係慷股東之慨，拎上市公司啲錢去捐，風頭自己出；明園慈善基金嘅資金來源就全部由馬明哲一個人照起，包括佢個人嘅薪水、獎金同埋未行使嘅期權。華華睇過平保06年度份年報，馬總舊年工資、津貼連福利有481.6萬人仔，另有1865.9萬獎金，即係首期捐款就係佢舊年份糧。
華華唔知馬總每個月出糧使唔使全數上繳屋企嘅「財務大臣」，但華華肯定馬太應該好贊成老公做慈善，事關「明園」個名就係取自馬明哲嘅「明」，同馬太陳園嘅「園」！做善事都夫唱婦隨，馬生馬太真係sweet。