西甲蠱惑波愛斯賓奴周日回師主場，面對完全洩氣的拉科魯尼亞，主W仍然可信，早捧無妨。
愛斯賓奴快車期連打兩場作客比賽，先有充滿疑點下，領先一球被維爾瓦下半場連入兩球，反輸1:2；不過周中作客西維爾，又打到鬼咁精神，勇挫西維爾3:2，打破對方主場不敗身。樂觀睇，可能愛斯賓奴一心留力打西維爾，以報上屆歐協盃決賽一敗之辱，今仗食住個勢返主場，隊長達蒙度又入番波，配合腳風好順的加西亞費南廸斯，海外亞洲盤讓至半球，似乎信心十足。
拉科之前取得1勝1和，諗住有番起色，不過周中竟主場吞維爾瓦兩蛋，有打回原型迹象；而且拉科仍然有柏保路阿莫、華拿朗等傷兵，始終都係信唔過。
文：牽牛