港股喺中秋節當日繼續發揮波動本色，恒指跌過300幾點，不過，喺中移動（941）力撐之下，個市收市只係跌121點，如果花旗股市昨晚生生性性企穩，港股今日趁住期指結算同季結，應該可以再做一齣好戲。
中移動走勢好靚，雷曼同里昂分別調高目標價至136元同140元，睇嚟唔係得個「吹」字，睇埋聯通（762）同中電信（728）嘅表現，應該係同國內電訊業重組有關，如果真係炒呢樣嘢，中移動炒上140元一啲都唔奇。
有人問俊樺隻滙控（005）點睇，隻股暫時冇乜炒上概念，但係如果炒落後都可以升一段急嘅，幾時會炒落後？唔知，但係股價如果守喺140元樓上，應該會伺機試146元，破到位就睇152元樓上。
平保C輪6836：平保（2318）前日報收101.5元，啱啱做咗紅底股，走勢會有啲反覆。不過，如果企喺104元樓上收市，前景就會一片秀麗，基金掃貨會更加狠，短線睇122元，可以買啲C輪6836，上日報收28.5仙，槓桿3.56倍（有效2.76倍），對冲值0.77，正股升上122元，6836應該喺45仙樓上，正股跌穿93元止蝕。