日劇《交響情人夢》除咗帶起古典樂熱潮外，飾演千秋學長嘅玉木宏亦成為唔少女性嘅偶像。查實齣劇喺韓國都頗受歡迎，阿Deep喺當地好多討論區度，見到網友討論邊個係韓版《交》劇最佳人選，當中唔少人都投玄彬同朱智勛一票，話佢哋啱做千秋學長。
玄彬喺韓劇《我係金三珣》時嘅恤衫打呔look，的確有幾分學長嘅風範，只可惜近期佢發福咗唔少，氣質方面扣咗唔少分。至於朱智勛向來官仔骨骨，但有人覺得佢形象比較陰沉，同角色唔係幾襯喎。
朱智勛太陰沉
至於由瑛太扮演嘅峰龍太郎，有人話佢似韓劇《達子的春天》嘅李民基，或者係韓劇《錢的戰爭》嘅申東旭。不過最離譜都係話小出惠介飾演嘅爆炸頭奧山真澄，韓版人選竟然係金楨勳！阿Deep覺得冇忽似。
喺咁多人選中，網友一致認同喺韓劇《大話妹》中扮演管家嘅男星安錫煥，似足騎呢指揮家法蘭茲。至於女主角野田妹，就同曾演出韓劇《戀愛時代》嘅李荷娜個格好似。韓劇製作人不妨參考網友意見，拍部韓版《交》劇實現大家嘅夢想。
版主：網盜王尊尼Deep
本欄逢周一至五刊出
推介朱智勛網址： http://tvzonebbs1.media.daum.net/griffin/do/photophoto/read?bbsId=A000004&articleId=272112
推介玄彬網址： http://tvzonebbs5.media.daum.net/griffin/do/humor/read?bbsId=A000011&articleId=53280