近年，各大車廠都會為車主提供各種駕駛訓練課程，等佢哋可以學習更高層次嘅駕駛技術。德國Benz就喺台灣搞咗個「主動安全操控體驗營」，3位德國高手教導港台傳媒應付突發情況嘅駕駛技巧，原來衝水氹時軚盤會失控亂轉，好危險，司機唔單止要冷靜捉實軚盤，還要踩實Brake等ABS系統啓動，免致鎖轆打圈！
記者、攝影：鄭達基
濕路急煞 失控打圈
一班來自香港嘅傳媒，被安排跟隨SLR專聘教練MichaelWeykopf學習駕駛技巧；Michael除擁有多年耐力賽經驗外，佢亦擁有多年駕駛訓練經驗。
我哋首個接受訓練嘅項目就係濕路急煞，學員駕駛新C-Class及E-Class房車，分別以40km/h及60km/h衝向遍佈積水嘅路面，並要落重Brake急煞；初時揸住新款C-Class嘅我，以時速40km/h進行練習時仲可以輕鬆應付，但改用E-Class以時速60km/h訓練嗰陣，由於遲咗踩Brake，搞到部車爭啲甩尾，好在有ESP，如果唔係？哈哈！
遇水氹 小心鎖轆
試玩完濕路急煞之後，小記特登問番教練Michael，對我喺課程入面嘅表現有乜睇法；佢話表現算唔錯，不過喺濕路急煞嘅環節上，仍有可以改善嘅地方。「你頭先喺濕路急煞訓練，加速衝向滿佈積水嘅路面嗰陣，速度就夠快，不過喺落重Brake之後反而揸唔實軚盤，可能同緊張有關，但咁樣會搞到部車甩尾兼失控，好易發生意外；日後喺路上遇到類似嘅緊急情況，一定要冷靜，踩實個Brake等ABS系統介入，將過度嘅制動力釋放之餘，等輪胎可以同路面有番抓着性，仲要揸實軚盤，停車都易好多㗎！」
至於緊急切線，都係同濕路急煞一樣，最緊要係唔好驚，喺臨到障礙物之前盡快睇清楚左右兩邊有無其他障礙物，如果無的話就要盡快Cut線，另外Cut線嗰陣一定要保持冷靜，亦要緊記揸實軚盤，免得因為咁而令部車失控。
瀝青搭階磚 難急煞
午飯後再玩濕路急煞，但路面改為瀝青加階磚，兩邊車輪喺唔同物料上，急煞難度更高，而我揸嘅係新款C-Class，喺亁地起步後好快加速到80km/h，跟足教練指示落Brake，發覺喺瀝青嗰邊嘅車輪咬到地，但階磚嗰邊就失控甩出去！由於兩邊咬地力差距太大，急煞難免失控，讀者若遇着呢類騎呢路面，真係要打醒十二分精神！
台灣記者：試齊安全系統
喺今次嘅訓練活動入面，大會安排咗我哋喺3位專業導師帶領下，學習更高層次嘅駕駛技巧。台灣嘅記者朋友James就好滿足：「平時無咩機會揸住部車咁樣練習，感覺好玩之餘仲可以提升駕駛技巧，最開心係試勻唔同款式嘅Benz，其安全系統喺唔同情況下嘅運用。」
後記：呆等七粒鐘 燒肉作補償
出發當日颱風韋帕吹襲台灣，令桃園機場關閉，影響航班，更延遲超過7個鐘先起飛，真係等得慘！好彩嚟到台灣，有得去誠品書店打吓書釘，跟住去埋一心堂品嚐炭燒烤肉，心情當堂好番晒。
