培華教育基金會由李兆基扯頭纜，同商界一班富豪籌辦。話說81年10月，工商界組織咗個13人訪問團去北京同西安，由四叔同霍震寰牽頭，原本諗住暢遊吓啫，點知班富豪返到祖國好感慨，想做番啲嘢，於是喺82年4月成立呢個基金會。
據講，當時一班富豪總共捐咗1000萬銀落基金度，然後將基金投資得嚟嘅回報，資助培訓內地專才。家吓開辦嘅研討班包括中國高級公務員經濟管理同開放建設，截至上個月，資助嘅高級公務員經濟管理研討班，就有1800人參加。
過去，由佢哋主辦同協辦嘅項目多達451個，有成萬四人受惠。家陣培華教育基金信託委員會主席依然係四叔，基金常務委員會主席就由霍震寰擔任。