Volvo畀人嘅感覺一向成熟穩重，即使係旅行車都一樣斯斯文文，好似年初推出嘅V70，外形設計行政味十足，夠晒大方，不過就略嫌少咗運動感。估唔到最近V70新版登場，竟然唔再執着，大膽換上一身運動Look。唔止大變臉，空間同動力都向前躍進，再觀內裝就更趨豪氣。要玩得斯文大方定係Sporty，任你揀！
記者：黎頌詩
攝影：梁細權
Model：AK
斯文靚仔Vs硬朗強悍
今年3月先喺日內瓦車展亮相嘅新一代V70終於喺香港登陸，相比起舊有嘅2.5T版本，無疑風格上有頗大嘅改變。事實上呢部全新嘅V70，可視為S80嘅旅行車版，喺車頭設計上，頗有S80嘅影子，和上一代近似S60嘅造型大為不同，整體線條變得更粗獷，最大特點係鬼面罩旁兩條相當粗大嘅前保護杆，採用咗與別不同嘅雙層式設計，令車頭看起來更有立體感之餘，視覺上亦更加硬朗強悍。
上一代採用嘅直條長方鬼面罩感覺上較為斯文，新版則換上和S80一樣嘅方格設計，不過線條就更粗更突出。車尾設計一樣甚有可觀性，有別於Volvo一貫方方正正嘅傳統，新V70嘅車尾充滿線條感，多重形狀不一嘅線條，令車尾看來有一份喺Volvo車中較少見嘅活潑跳脫，個人覺得，比車頭更叫人驚喜。車身兩旁嘅立體腰線被去除，睇起嚟更加簡潔利落。
全力谷豪華感
外觀全身運動化嘅新V70，內櫳更加係徹底變身，全力催谷豪華感。睇真啲，薄片式中控台，更為闊大嘅儲物空間和手枕，以致車門嘅設計，都可以話整個鋪排係S80嘅翻版。不過好奇怪，雖然豪華感一樣爆棚，但兩者嘅風格卻不相同，仔細觀察，原來係用料同配色不同所產生嘅效果。S80嘅車頭同中控台佈置，加添咗比較典雅嘅桃木裝飾，而新版V70明顯亁淨利落，金屬取代木料，只用銀黑兩色，換嚟嘅係一派冷峻，忍唔住要讚一句：好型！出人意表嘅白色座椅，令色彩形成大膽強烈嘅對比，亦令內櫳顯得風格獨特。
上一代低調沉實，新版大膽豪放，畀你多一個選擇，但講到Sporty，就肯定係3.2版佔優，淨係座位同尾廂之間嘅一塊繩網就已經攞晒分，再睇埋比上一代更闊大嘅超巨型尾廂，大型行李放多幾件都無問題。最貼心仲係打開尾廂底板，竟然有個同樣巨型、仲有埋間隔嘅儲物空間，令旅行車嘅實用性更為突出。
最Buy軚感一流
新版V703.2整體嘅體積比上一代為大，但由於外形變得更為流線，所以完全無笨重嘅感覺，有少少意外係操控比想像中靈活。3.2公升自然吸氣（NA）引擎，馬力有238匹，配6前速Geartronic自動波箱，有埋適應性轉換系統，畀你選擇行車模式，駕馭可以話無難度。首先佢無大車經常出現嘅睇位困難情況，彎路表現亦暢順靈活，最正嘅係軚感一流，操控感相當實在。
雖然新版嘅車價較2.5T版本貴4萬，但從升級咗嘅豪華度、性能同令人耳目一新嘅賣相去衡量，呢個升幅都算合理。
VolvoV703.2規格
引擎：3,192c.c.直6
馬力：238hp/6,200rpm
扭力：320Nm/3,200rpm
傳動：6前速自動波
查詢：VolvoCarHK（29273388）
