車路士領隊摩連奴離隊，震動世界球壇，豈止球會人士討論，人力資源專家亦有意見，譬如《頭條日報》訪問人力資源管理學會外務總監吳克儉，吳先生話打工仔要懂得妥協，在適當時候聽從上司指示，但亦要堅持個人宗旨，做覺得正確的事。另一位顧問周綺萍就話如下屬不得老闆歡心，不如轉工，但打工仔最好仍是努力苦幹，避免與老闆直接衝突。
老闆當然永遠是對的。威風如摩連奴，計成績表現，絕對交到貨有突，今年只有四十四歲，只係仲未攞過歐洲國家盃與世界盃而已！佢講過年紀大咗，將近六十歲之時，就希望做葡萄牙國家隊領隊，目標當然係直指上述兩大盃賽。但一山難藏二虎，一間大球會難以容納兩個大ego，要離開嘅，當然唔會係大老闆。著名球評家，《獨立報》嘅JamesLawton評論摩連奴辭職，係車路士集體自殺，阿巴拉莫域簡直莫名其妙。
打工仔冇料到，會被炒，做得好叻，一樣會被炒，例如皇馬卡比路，攞咗西甲冠軍之後，竟然走人，現在摩連奴都難逃一劫。究竟打工仔如何自處呢？要做到費格遜、雲格兩位咁出神入化，地位穩如泰山嘅打工仔，相信要有才氣，有運氣，兼碰到一個容忍力好高嘅老闆，三者缺一不可。
摩連奴話暫時冇班落，等人打電話畀佢。等到幾時呀？祖雲達斯冇錢，國米剛與文仙尼簽新約，AC嘅安察洛堤上季攞咗歐冠盃仍在蜜月期，皇馬會長曾奚落摩連奴，況且今季仲未輸過，與教練蘇斯達仍在蜜月期；巴塞係摩連奴做繙譯出身嘅地方，過去連續兩季在歐冠盃硬碰車仔，結下恩怨情仇，法甲德甲不在摩連奴眼內，真係天下之大，無以容身。
阿巴拉莫域亦唔好受，今季以後用格蘭領軍，大將不服，分分鐘喺明年一月轉會期各自高飛，成隊散晒，大老闆即使有大量金錢去畀佢浪費，可以用錢擲死人，亦難收拾殘局。呢個故事教訓我哋，所有打工仔都要熟習年羮堯。