梁漢文（梁炳）之前曾稱今年會與拍拖11年的同居女友Karen拉埋天窗，但拖拖吓卻無聲無息，反而有傳Karen因太愛shopping花光男友積蓄，但梁炳甘之如飴，指女友用他的錢購物沒問題，他樂於接受兼會更積極工作，多棲發展，一於勤賺老婆本讓女友繼續有surprise。
梁漢文很靜，靜到幾乎要報警尋人，若不是他將推出新歌加精選，差點就讓人遺忘了這位去年曾在《美女廚房》中、五官擠成一堆被迫試吃地獄餸菜的主持。近年唱片業陷低潮，幾乎齋靠唱歌搵食的梁炳都不知怎算，而他所屬的金牌娛樂先後重點煲側田、小肥和古巨基，梁炳只能排隊等捧。
「用男友錢都好應該」
日前梁炳在中環接受訪問時說：「呢樣係必然，新人出嚟冇耐，當然要做多啲宣傳，至於自己就性格使然，比起其他歌手略為低調，但我越嚟越發覺唔平衡，以前覺得冇問題㗎，𠵱家唔可以啦，我完全明白時勢轉變，所以嚟緊會做唔同嘅嘢。」
梁炳說他有工開，經濟沒問題，但有傳其女友林文慧（Karen）感染了徐濠縈的購物習慣，經常買衫，花光男友積蓄，梁炳即緊張說：「女人買吓嘢好正常，女仔都會貪靚、要打扮吓，有時佢行街買嘢，係買畀我咋！其實佢有幫人做形象設計，所以你哋先成日見佢行街買嘢，佢一啲都唔大使，絕對可以接受，完全冇問題喎，女人用吓男朋友錢都好應該。」
梁炳錫到女友燶，難怪Karen非君不嫁，之前梁炳曾表示今年結婚，但拖兩拖又婚期成謎，他笑說：「因為李克勤結婚，啲愛情長跑手開始嚟，令到大家估下一個係我，𠵱家我又未有實在嘢，再答好似冇乜意思，乜都講晒畀你知，咁佢仲有surprise嘅？希望大家體諒啦。」
採訪：朱倬誼
攝影：陳順禎
化妝：YamLai
髮型：Moe@ChinG.
場地：CaliforniaRestaurant
