古靈精怪東南亞，彭順一定認同，不然《C+偵探》唔會又到泰國取景。至於西片鬼戲，核突喪屍居多，一係走唔出《閃靈》大屋格局，但論恐怖始終不及東南亞鬼話連篇。既然哈囉喂靠嚇，今年海洋公園揀啱條正路，加入中日式嚇鬼元素，有鍾馗、貞子兼且冥通大靈堂，總數7間鬼屋今日正式開始嚇到萬聖節。
記者︰陸俊雄
攝影︰陳盛臣
Model︰Sakura、Vivica、Meeco
必試3大中日鬼屋
如選擇海洋公園正門進入，而非大樹灣那邊，鍾馗捉鬼係熱身項目，因驚嚇度不高。最嚇人反而係鍾馗的扮相，但勝在全場夠靚。用靚來形容鬼屋？冇錯，因為鍾馗出現的地方是怡紅院，樓上有王小鳳般的紅衣厲鬼。再行會見到靚女鬼彈古箏，佢厲害在面向暗藏風機，當風吹來時頭髮飄揚，有六指琴魔的氣勢。
如果膽大唔使熱身，建議由大樹灣進入，另外兩大鬼屋冥通大靈堂和東瀛「凶」間都在那邊。大靈堂其實指殯儀館，先來有點《鬼域》的格局，紙紮公仔得閒就攝出來，戲肉當然係有張阿婆車頭相的靈堂位；當大家還在猜測棺木會否開蓋時，陰司姐突然出現。
至於東瀛「凶」間係明玩貞子現身，四周電視仲有些播放住《午夜凶靈》的經典「望住個井」和「咒怨文字」等片段。雖然估到海洋公園派出井內凶子隨時現身，但咁多部電視在場，最慘係估佢唔到在邊部爬出來。少女們試過後，都話最驚係佢，達最高5分的驚嚇度。
死囚浩劫嘈到坼天
除了三大鬼屋必試，其餘仲有四處鬼地方畀你慢慢嘆。如死囚浩劫係大放迷煙的地方，亦是最嘈的一間鬼屋。除了警鐘響不停，死囚會拍打鐵欄不斷叫︰「放我出來。」更有大漢由監倉殺出，可惜演員同入場人士唔可以有任何身體接觸，所以就算幾「兇」都係正宗「得把聲」。
西式驚嚇主題一般
想應節一試西方哈囉喂，要到奪命「嚇」輪、瘋醫生解剖室和鬼「旅」逃生。上「嚇」輪要有心理準備，是最多迷煙的鬼屋，四周白濛濛令人進退失據，鬼船員會睇準時機出現。瘋醫生則類似《生化危機》，驚嚇度一般。還有不得不提鬼「旅」逃生，實際上佢唔係一間屋，係將滑浪飛船裝身，船經途上，有喪屍幽靈拿起刀槍嚇你。
少女被嚇後感
東瀛「凶」間最猛
Meeco︰「玩咗大靈堂和東瀛鬼屋已經頂唔順，貞子出現嚇到腳軟，宣佈投降。」
Vivica︰「以為大靈堂掛死屍位已經夠恐怖，原來東瀛鬼屋個井邊仲得人驚。」
Sakura︰「最估唔到東瀛鬼屋有鬼在頭頂出現，其他鬼屋都冇咁嘅事發生。」
「哈囉喂」夜票開放時間及入場費
開放日期︰9月28日至10月31日逢星期五、六、日及公眾假期
開放時間︰17:30-00:00
夜場門票︰成人$215，小童$108（9月28日至10月14日）；成人$270，小童$135（10月18日至10月31日）
查詢︰25520291
廸士尼阿Jack做主角
唔理算唔算玩跟風，廸士尼今年都有萬聖節活動推出係不爭事實，名為「黑色世界」，而且早在中秋當晚已經開幕。咁啱同海洋公園一樣，佢個「掉轉頭」廣告俾人投訴，老實講個廣告幾好笑，估唔到香港人的接受能力咁低。
廸士尼冇7間鬼屋咁多，所以主力放落晚上7時舉行的夜光鬼魅巡遊，《怪誕城之夜》的阿Jack聯同南瓜人等，坐在夜光花車上於美國小鎮大街Showoff。睇巡遊唔夠喉？親身落場，一試改裝後加上「驚心動魄」鬼元素的飛越太空山，或試佢哋唯一的一間鬼屋，叫大街詭異酒店。要小心愛做醫學實驗的酒店前主人James，講到有入冇出，大玩失蹤人口。唔好諗住廸士尼合家歡Channel唔會點嚇人，事先聲明詭異酒店唔啱小朋友玩㗎。
「黑色世界」夜票開放時間及入場費
開放日期︰9月25日至10月31日
開放時間︰18:00-23:00
夜間門票︰$198（9月28日至10月31日逢星期五、六）；全日票由9月25日起，已包玩萬聖節項目。
查詢︰1830830
