數碼達人：半條命　同外星人決戰

要數出名同多人玩嘅第一身射擊遊戲，相信好多人都會諗起《Half-Life》，自98年推出，已經有唔少版本，今次新推出《Half-Life2:TheOrangeBox》除咗有最新《Half-Life2:Episode2》外，更會包括以往相當受歡迎嘅《Half-Life2:Episode1》同《Half-Life2》，讓玩家可以重溫回味，另外仲送埋《TeamFortress2》、《Portal》及香港版才有嘅《CounterStrike1.6》，真係大件夾抵玩！

記者：許福合

全新武器上陣

有玩開《Episode1》嘅玩家，其實可視《Episode2》為續集，玩家將會繼續化身主角GordonFreeman，與女主角AlyxVance，回到17號城市在被外星人控制的世界冒險。上一集，玩家幾經辛苦先逃出17號城市，估唔到今集故事就要玩家拚命回到城市中央要塞，去關閉外星人通往地球嘅唯一入口「傳送門」。由於路程相當遙遠，玩家除咗要在城市行走，更要穿梭於森林、地雷陣、導彈發射台等地區，所以今集就加入咗汽車代步，唔使好似上一集咁辛苦，全程要用腳走；而且汽車上更會有武器及一定防禦力，行走時會儲Turbo方便危險時使用。武器方面，增加咗Strider及Buster；另外原有重力槍威力更強，畫面當然更勁！更加過癮是新增傳送槍，遇到無路可走時可用傳送槍開啓一道超空間，玩家穿過後即到達目的地，好方便。

■估唔到外星人外形都有好幾種。

■今集要由城外冒險回到城市中央。

A.I.大幅加強

記得上一集玩家有美相伴，Alyx遊戲之中亦有唔少支援；而今集玩家與Alyx關係更為密切，有唔少劇情難題要由Alyx解開，戰鬥時亦會為玩家作火力支援，係個相當好的拍檔。不過當汽車碰撞時，Alyx都會發出尖叫，就真係幾得人驚！而玩家冒險途中，可以對各種建築物大肆破壞，隨之而來會出現煙火效果，玩落就好似身處現場一樣。至於遊戲光影效果例如外星人身上倒影、殺人時血花四濺場面，都相當真實，應是由於今集使用上全新Source物理引擎，玩家進入遊戲時記得留意。