袁彌明近日喺專欄揶揄無綫總經理陳志雲嘅愛將崔建邦，搞到被「急凍」，抽起佢喺《娛樂直播》嘅主持工作。不過馮仁昭八到袁彌明同崔建邦原來有過一段鮮為人知嘅關係！
話說袁彌明05年選完港姐後加入無綫，當時崔建邦已經嗒佢糖，背住當時嘅緋聞女友唐詩詠展開追求，仲有人見過佢同袁彌明手拖手夜遊中環㖭，但戀情最後無疾而終。呢對過氣情侶再見做唔番朋友，雖然後來合作主持《娛樂直播》，但就零交流。
死撐有交流
馮仁昭噚日打電話問袁彌明，佢話：「所有關於崔建邦嘅嘢，我一句都唔回應，你哋問番佢啦，佢嘅回應就係我嘅回應。」問到擇偶條件，袁彌明話：「我首選身高要5呎10吋嘅。」至於崔建邦就透過經理人否認戀情，並話：「冇咁嘅事，從來冇發生過，冇意圖或企圖追求佢。」又唔認同袁彌明冇交流：「做節目始終要互動，溝唔溝通到見仁見智。」
唐詩詠噚日對於崔建邦背住佢偷食，佢話：「唔知，佢兩個嘅嘢問番佢哋。」會唔會追問崔建邦？佢聽完就十足正印咁回應：「我哋係好朋友，做乜我都相信佢。」
此外，崔建邦噚日接受商台電話訪問，當時佢正喺深圳機場，準備出發攀登玉珠峰。有指今次出征係「溶雪」之旅，佢話：「我已經收到指示爬完山返嚟做《再見歡樂今宵》，返嚟即刻開會。」
