分析員要做北水入面的一條水魚，再吸水成為大魚，要從一隻上市殼股埋手。漂亮的殼股，可遇不可求，但不外乎大股東年華老去，或者家族生意兄弟不咬弦，無心戀戰而業績低落。這類靚殼，比起公司文件由ICAC又或者CCB全部扣起的，價錢較貴，但亁手淨腳。
難度最高的，是如何用最少的錢將整個軀殼𡁻下。寄望軀殼入面有優質資產，最為正路，但你識計算時人哋亦曉計，有如此理想的筍盤，價錢本身已經極貴，加上現在多人爭，未必是初次下海的分析員可以消化。先用借錢方法，借一筆作為首期，股票到手後，才趁股價上升，套現還債。
這一招正是高風險高技術。分析員就算薪高糧準，都未必至於腰纏萬貫。夠膽借盡，支付高息，私人上身，並非是每個飽讀詩書的分析員敢博敢做。中間有甚麼方法先借後還，空手將一個靚殼接回來？Sorry，你付的六蚊，未夠俾下一堂學費。
當一個靚殼到手之後，如何經營，又要考分析員功夫。分析員對所有財技動作，滾瓜爛熟。拿賬簿一看，把一把脈，就知道公司氣虛貧血，要調理進補。分析員先會將垃圾賣掉，耍幾手會計安排，令公司盈利有所增長。那幾項安排是萬試萬靈？對，記住，六蚊。
調理完畢，是進補。供股，openoffer，拆細、紅股、GO，分析員每種伎倆都可以由尾背上頭，但最關鍵，其實是市況。市況暢旺，白癡都可以籌一百幾十。除了市旺之外，還要故事。每逢殼股轉手之後，都會轉型，要為公司進補之後注入羊胎素，令體魄強健之餘，還有皮膚細滑，容光煥發，由內靚到外。
就這樣，分析員搖身一變，下海做deal，一單做完，再做另一單。有了第一次經驗，就有人願意抬錢給你，亦同時可以向高難度挑戰，搖身變成白武士。分析員從此過着有時無所事事，有時趕到甩肺的生涯。與以往朝七晚十二，日日充實，差天共地。
方卓如網址： http://fongcheukyu.blogspot.com/