好多人都知，合和（054）太子爺胡文新鍾意打冰球。華華收到風，今個禮拜六，佢一手籌辦嘅冰球學校正式開檔，今勻唔單止搵咗佢阿媽胡郭秀萍做校董，仲揼埋東亞（023）寶哥哥大仔民橋，同信和（083）黃志祥位公子黃永光兩個老死心口，齊齊做學校嘅榮譽贊助人；不過，佢冇預到冰球隊友小賭王何猷龍噃！
冇預隊友小賭王
除咗老死幫拖，胡文新仲搵到馬會主席夏佳理、行政會議非官守議員羅仲榮、蘭桂坊之父盛智文、香港青年協會總幹事王䓪鳴，同埋香港馬主協會會長吳守基出錢贊助。搵到人出錢，仲要搵人出力做教練，可能胡文新覺得，香港冇乜呢方面嘅人才，所以走到去加拿大搵。
據華華所知，冰球學校嘅總經理兼教練BarryBeck，係加拿大國家冰球隊前成員，今次仲係透過入境處嘅優才計劃嚟香港打工。搞冰球學校搞得咁認真，胡文新對呢個興趣有幾熱愛，大家感受得到喇！