最近俾蘋果波神「雞」我，話我貼啲刀仔鋸大樹未中過，講真，幾十蚊博幾雞你估咁易咩，不過保持以小博大心理，相信中番一次就夠飽。
今次繼續專攻波膽過關3串4，挪超嘅維京是小弟近期愛隊，呢班波為咗爭標，近期着晒火，近4戰贏咗3場；而且憑佢地一對大勇箭頭奧廸加特同伊積，贏親波都有3球進賬，單憑維京一邊入波已經夠開「大」，不過球隊就算有前國腳門將米列把關，始終後防唔多穩，正牌入得又失得。
周六維京主場就會對史卓加斯特，史軍上次落後兩球，可以反勝史達3比2，有一定入球能力，維京今季已經開出4次贏3比1波膽，追多一次無妨。
西維爾打歐聯信唔過
下周中又有歐聯，歐聯效應絕對唔可以唔考慮，特別歐聯首戰已經失利球隊；西甲嘅西維爾歐聯首戰已經吞阿仙奴3蛋，下周二主場對布拉格斯拉維亞，再唔贏出線就凍過水，周六作客薩拉戈薩已經有顧忌；而且從西班牙地理上，西維爾位於南部，薩拉戈薩位於北部，西維爾遠征一向唔多掂，上季咁強勢，都作客輸1:2，今次一於再追薩拉戈薩贏2:1。
德甲嘅史特加情況相似，歐聯首仗已經敗走格拉斯哥流浪，下周主場對巴塞隆拿，又係唔輸得；羅斯托克前仗終於主場贏波，信心好番啲，今仗雖然未必贏得史特加，不過博和波都有機，冷敲2:2波膽啦！
貼士
波膽過關（賠率為參考賠率）
星期六15羅斯托克和2:2（11倍）x
星期六52維京勝3:1（9倍）x
星期六56薩拉戈薩勝2:1（8倍）3x4
全中1,051倍