之前玉皇朝（970）一路吹風，話《神兵小將》會喺內地播，仲會生產好多衍生產品，噚日終於有實質嘢公佈。
黃玉郎可以講係香港漫畫界一代宗師，記得當年，華華個個禮拜同同學仔夾錢買《龍虎門》輪流睇。不過時代唔同咗，黃玉郎話家陣啲細路，睇漫畫同佢嗰陣嘅口味好唔同，為咗keep住唔好out，佢家陣諗到新古仔，會畀身邊嘅小朋友睇，跟住搵百幾二百個小學生畀意見。
卡通下月中央台播
不過佢話細個時一啲都唔揀擇，係漫畫都睇，許冠文（唔係影藝界嗰個）嘅《財叔》、王澤嘅《老夫子》都有睇，個個主筆都啓發過佢。
至於全套52集嘅《神兵小將》，玉皇朝投資咗3000萬銀，10月4號開始喺中央電視台少兒頻道播放，先播26集，剩番26集留喺農曆新年播。投資咗咁多錢，幾時先有回報？玉皇朝一眾高層都唔肯預測，只係話中國有3.7億兒童同少年，VCD、DVD製作及發行、其他衍生產品授權等，可為公司帶來唔錯收入，佢哋噚日就同廣州歡樂反斗城簽約，授權對方用《神兵小將》肖像生產玩具。