陳法蓉、傅穎（Theresa）、唐寧、趙學而同林子萱噚日現身聚集滿貓貓狗狗嘅青衣城，擔任「香港傑出動物大獎2007」頒獎嘉賓，陳法蓉同趙學而分別帶埋五個月大嘅狗囡囡同歲半大嘅貓貓Bikini捧場。陳法蓉率先抱住囡囡頒獎畀得獎警犬，唔知係咪囡囡太吸引，令訓練有素嘅警犬都忍唔住想撲埋去，嚇到陳法蓉不停咁縮。
陳法蓉講番因為4月先後兩隻老狗過身，令屋企剩底兩隻老狗悶悶不樂，佢聽人講話添新成員會有助解悶，點知囡囡返到屋企，兩隻老狗仲覺得失寵唔開心。佢話：「囡囡好百厭，將屋企傢俬咬爛晒，等佢大啲要大裝修間屋，再等兩隻老狗百年歸老後，先再添多隻狗仔開枝散葉。」提到亞視招兵買馬，法蓉承認亞視有同佢傾，但只係部頭形式，因為佢本身有經理人合約，等睇埋劇本再決定。
Theresa愛犬做狗醫生
Theresa原本想帶埋隻八哥出席，不過大會臨時話唔使帶，所以搵朋友送返屋企，佢話：「我隻狗天生身肥腳幼，行兩步就要唞，但有潛質做狗醫生，所以會帶佢去受訓，造福社會。」
